Koreya Universitetinin Tibb Kollecinin gerontoloqları müəyyən ediblər ki, qocalma ilə əlaqəli HMGB1 adlı zülal gənc hüceyrələri də zədələyə və onların aşınma prosesini zəncirvari şəkildə başladaraq "yoluxdura" bilər. 

BAKU.WS xəbər verir ki, araşdırmanın nəticələri Metabolism – Clinical and Experimental (MCE) jurnalında dərc olunub.

HMGB1 insanın bütün ömrü boyu orqanizmdə istehsal olunur. Gənc insanlarda bu zülal hüceyrə daxilində yerləşərək onların normal fəaliyyətini təmin edir. Lakin yaşlandıqca qocalan hüceyrələr HMGB1-i hüceyrə xaricinə "atır".

Laboratoriya təcrübələri göstərib ki, HMGB1 hüceyrədənkənar məkana düşdükdə qonşu hüceyrələrin reseptorları ilə qarşılıqlı təsirə girərək onlarda qocalma proseslərini işə salır. Zədələnmiş hüceyrələr isə cavab olaraq yenidən HMGB1 ifraz edir və bu, dəyişikliklərin bütün orqanizmə sürətlə yayılmasına səbəb olur.

Alimlər qeyd ediblər ki, bu zülalın iki forması mövcuddur: aktiv və qeyri-aktiv. Aktiv forma hüceyrələrə zərər verir və iltihab reaksiyasına səbəb olur, qeyri-aktiv forma isə zərərsizdir. Təcrübələr göstərib ki, hətta gənc hüceyrələr belə aktiv HMGB1 ilə təmasdan sonra bölünməyi dayandırır və iltihaba səbəb olan maddələr ifraz etməyə başlayır.

Bu mexanizm ilk dəfə yaşlı travma xəstələrinin tədqiqatı zamanı müşahidə edilib, daha sonra siçanlar üzərində aparılan təcrübələrlə təsdiqlənib. Müəlliflərin fikrincə, qocalma toxumalarda tədricən deyil, sürətlə – zəncirvari şəkildə yayıla bilər ki, bu da onun ləngidilməsi üçün yeni müalicə üsullarının işlənib hazırlanmasına imkan yaradır.