İcbari tibbi sığorta ölkə üzrə tətbiq olunmağa başladıqda Agentlik ilkin mərhələdə 20 özəl klinika ilə müqavilə bağlamışdı. Vətəndaşların sağlamlıq xidmətlərinə çıxış imkanlarını artırmaq məqsədilə bu siyahı illər ərzində genişləndirilib. Hazırda Agentlik tərəfindən 190-dan çox özəl tibb müəssisəsi ilə əməkdaşlıq edilir.

Agentlikdən AVESTA.AZ-ə verilən açıqlamaya görə, müqaviləli özəl xəstəxanalar həm paytaxtda, həm də regionlarda fəaliyyət göstərir. Qanunvericiliyə əsasən, vətəndaşlara İcbari Tibbi Sığorta çərçivəsində TƏBİB-in tabeliyindəki dövlət tibb müəssisələrində və Səhiyyə Nazirliyinin tabeliyindəki 9 elmi-tədqiqat institut və mərkəzdə xidmət göstərilə bilmədikdə, onlar göndəriş əsasında özəl tibb müəssisələrinə yönləndirilir.

2025-ci ilin əvvəlindən isə göndəriş tələb olunmadan vətəndaşlar birbaşa Azərbaycan Tibb Universitetinin tədris-terapevtik və tədris-cərrahiyyə klinikalarına, eləcə də Bakı Sağlamlıq Mərkəzinə müraciət edərək stasionar tibbi xidmətlərdən yararlana bilirlər. Bu xidmətlərin xərcləri icbari tibbi sığorta hesabına qarşılanır.

Agentlik gələcəkdə də müqaviləli özəl tibb müəssisələrinin siyahısını genişləndirməyi planlaşdırır.

Şahanə Xankişiyeva