Azərbaycan kinosunun unudulmaz simalarından biri olan Həsən Məmmədov milli kinomuzda çoxlu yaddaqalan obrazlar yaradıb. Mirzə Səfər, Dədə Qorqud, Bəxtiyar, Qəmərlinski kimi personajlar onun aktyor ustalığının bariz nümunələridir. İlk dəfə "Böyük dayaq" filmində canlandırdığı Qaraş obrazı ilə kinoda öz güclü potensialını sübut edib. Onun yaratdığı rolların çoxu qəhrəman xarakteri ilə seçilib və tamaşaçıların yaddaşına həkk olunub.

Bu gün kino sənətinin inkişafında əvəzsiz xidmətləri olan Dövlət mükafatı laureatı, Xalq artisti Həsən Məmmədovun anım günüdür.

Görkəmli sənətkar 1938-ci il noyabrın 22-də Salyan rayonunda dünyaya gəlib. Orta məktəbi bitirdikdən sonra Bakı Dövlət Universitetinin (o dövrdə Azərbaycan Dövlət Universiteti) Fizika-riyaziyyat fakültəsinə qəbul olub. Lakin ikinci kursdan sonra təhsilini yarımçıq qoyaraq teatr sənətinə üz tutub. Bir müddət müxtəlif teatrların yardımçı heyətində çalışdıqdan sonra 1958-ci ildə Mirzağa Əliyev adına Azərbaycan Dövlət Teatr İnstitutunun Dram və kino aktyorluğu fakültəsinə daxil olub. Tələbəlik illərində fasilələrlə Dövlət Radiosunda diktor işləyib. 1962-ci ildə Mehdi Məmmədovun kursunu bitirərək Akademik Milli Dram Teatrına göndərilib. Burada fasilələrlə on il çalışıb və paralel olaraq kinoda da fəaliyyət göstərib.

Həsən Məmmədovun kino karyerası ildən-ilə yüksəlib. 1972-ci ildə "Azərbaycanfilm" kinostudiyasına işə qəbul edilib. Sonrakı illərdə həm teatrda, həm də kinoda parlaq obrazlar yaradıb. O, 1992-ci ildən ömrünün sonunadək Akademik Milli Dram Teatrında fəaliyyət göstərib.

Onun yaradıcılıq irsində "Böyük dayaq" (Qaraş), "Arşın mal alan" (Əsgər), "Gün keçdi" (Oqtay), "Arxadan vurulan zərbə" (Qəmərlinski), "Bir cənub şəhərində" (Murad), "Yeddi oğul istərəm" (Bəxtiyar), "Dədə Qorqud" (Dədə Qorqud), "Axırıncı aşırım" (Abbasqulu ağa), "İstintaq" (Murad) və daha onlarla filmdə canlandırdığı obrazlar xüsusi yer tutur.

Sənətkarın əməyi yüksək qiymətləndirilib. 1971-ci ildə Əməkdar artist, 1982-ci ildə isə Xalq artisti adına layiq görülüb. "İstintaq" filmindəki Murad roluna görə SSRİ Dövlət mükafatı, "Birisi gün gecə yarısı" filmindəki ifasına görə isə Azərbaycan Dövlət mükafatı ilə təltif olunub.

Azərbaycan teatr və kino sənətinə böyük töhfələr verən Həsən Məmmədov 2003-cü il avqustun 26-da vəfat edib.