Bakı Ağır Cinayətlər Məhkəməsi 2000-ci il təvəllüdlü Gürcüstan vətəndaşı barəsində hökm çıxarıb. Məhkəmə materiallarına əsasən, təqsirləndirilən şəxs Azərbaycan Respublikasının Cinayət Məcəlləsinin 171.2.4-cü (tamah niyyəti ilə yetkinlik yaşına çatmayan şəxsi fahişəliyə cəlb etmə) və 243.1-ci (tamah niyyəti ilə qadını fahişəliyə cəlb etmə) maddələri ilə təqsirli bilinib.

BAKU.WS-in məlumatına görə, hadisə 2023-cü ilin dekabr ayının sonundan 2024-cü ilin fevral ayının əvvəllərinə qədər olan dövrdə baş verib.

Təqsirləndirilən şəxs Abşeron rayonunun Xırdalan şəhərində yaşadığı evdə yetkinlik yaşına çatmayan (2008-ci il təvəllüdlü) zərərçəkmiş şəxslə və digər qadınla tanış olub. O, onları kişi müştərilərlə pul müqabilində (200-250 manat) cinsi əlaqəyə cəlb edib və özü üçün 150-200 manat gəlir əldə edib.

Yetkinlik yaşına çatmayan zərərçəkmiş təxminən 4-5 dəfə, digər zərərçəkmiş isə 9-10 dəfə Bakı şəhərindəki müxtəlif otellərdə müştərilərlə görüşdürülüb.

Məhkəmə istintaqı zamanı təqsirləndirilən şəxs ibtidai istintaqda günahını etiraf etsə də, məhkəmədə özünü təqsirli bilməyib. O, zərərçəkmişlərin "TikTok" sosial şəbəkəsi vasitəsilə tanış olduğunu, onların könüllü olaraq fahişəliklə məşğul olduğunu iddia edib.

Lakin məhkəmə bu iddianı qəbul etməyib, çünki sübutlar (zərərçəkmişlərin ifadələri, şahidlər) təqsirləndirilən şəxsin tamah niyyəti ilə fahişəliyi təşkil etdiyini təsdiqləyib.

Məhkəmə təqsirləndirilən şəxsi Cinayət Məcəlləsinin 171.2.4-cü maddəsi ilə 4 il azadlıqdan məhrum etmə (2 il təlim-tərbiyə fəaliyyəti ilə məşğul olmaq hüququndan məhrum etməklə) və 243.1-ci maddəsi ilə 2 il azadlıqdan məhrum etmə cəzasına məhkum edib. Qismən toplama yolu ilə qəti cəza 5 il azadlıqdan məhrum etmə (2 il təlim-tərbiyə hüququndan məhrum etməklə) müəyyən olunub. Cəza ümumi rejimli cəzaçəkmə müəssisəsində çəkiləcək. Təqsirləndirilən şəxs əcnəbi olduğundan, cəzanı çəkdikdən sonra Azərbaycan hüdudlarından məcburi çıxarılacaq.