COP29 iqlim konfransı Azərbaycanı qlobal iqlim diplomatiyasının mərkəzinə çıxarıb və bu proses inkişaf etməkdə davam edir.

BAKU.WS report-a istinadən xəbər verir ki, bunu BMT-nin Azərbaycandakı rezident-əlaqələndiricisi Dmitro Şlapaçenko Bakı İqlim Fəaliyyəti Həftəsi (BCAW 2026) çərçivəsində keçirilən dəyirmi masada bildirib.

Onun sözlərinə görə, Azərbaycan iqlim liderliyinin beynəlxalq əməkdaşlıq üçün lazımi impuls yarada biləcəyini nümayiş etdirib.

O qeyd edib ki, Bakı İqlim Fəaliyyəti Həftəsi COP29 çərçivəsində başlanan səylərin, eləcə də dayanıqlı inkişafın və iqlim tədbirlərinin təşviqi üzrə daha geniş işlərin davamı olub.

"Biz Azərbaycanda iqlim liderliyinin necə təkan yarada biləcəyinin şahidi olduq. COP29 ölkəni qlobal iqlim diplomatiyasının mərkəzinə çıxardı və bu təkan Bakı İqlim Fəaliyyəti Həftəsi, eləcə də dayanıqlı inkişafın və iqlim fəaliyyətinin təşviqi üzrə daha geniş səylər sayəsində davam edir", - Şlapaçenko vurğulayıb.

O həmçinin qeyd edib ki, bu gün yaranmış iqlim dinamikasını konkret və ölçülə bilən nəticələrə çevirmək vacibdir.

Şlapaçenkonun sözlərinə görə, iqlim liderliyi yalnız qəbul edilmiş qərarlar və verilən vədlərlə deyil, eyni zamanda emissiyaların faktiki azaldılması, dayanıqlığın gücləndirilməsi, maliyyə resurslarının səfərbər edilməsi, habelə insanların və onların dolanışıq vasitələrinin qorunması ilə qiymətləndirilməlidir.