17-18 sentyabr tarixlərində keçiriləcək Baku ID 2026 regionun startaplarını, investorlarını, biznes liderlərini və innovasiya ekosisteminin nümayəndələrini Bakıda bir araya gətirəcək.

Qafqaz, Mərkəzi Asiya, Yaxın Şərq və Şimali Afrika regionlarını əhatə edən aparıcı innovasiya və startap investisiya platformalarından biri olan tədbirə bu il Bolt for Business tərəfdaş olaraq dəstək verir.

Bolt 2013-cü ildə Estoniyada startap kimi fəaliyyətə başlayıb və sonrakı illərdə qlobal mobillik platformasına çevrilib. Bu gün şirkət 50-dən çox ölkədə və 850-dən çox şəhərdə fəaliyyət göstərir, platformadan 200 milyondan çox müştəri və 4,5 milyondan çox sürücü, kuryer və biznes tərəfdaşı istifadə edir.

Startap kimi yaranmış bir şirkət olaraq Bolt innovasiya və sahibkarlıq ekosisteminin inkişafını təşviq edən təşəbbüslərin əhəmiyyətini yaxşı anlayır. Buna görə də Baku ID kimi tədbirlərə dəstək vermək şirkət üçün bu ekosistemin inkişafına töhfə verməyin yollarından biridir. Baku ID innovasiya festivalının əvvəlki buraxılışları ümumilikdə 13 500-dən çox iştirakçını və 375-dən çox startapı bir araya gətirib.

Bolt for Business tərəfdaşlıq çərçivəsində tədbir iştirakçılarına Baku ID-yə və tədbirdən geri səfərlərə 30% endirim təqdim edəcək. Bundan əlavə, tərəfdaş təşkilatın əməkdaşları üçün Bolt for Business balansı ayrılacaq.

Bolt for Business şirkətlərə əməkdaşların, qonaqların və tərəfdaşların səfərlərini vahid platformadan idarə etməyə və nəqliyyat xərclərinə nəzarət etməyə imkan verir. Baku ID kimi genişmiqyaslı tədbirlərdə bu yanaşma iştirakçılara şəxsi avtomobildən istifadə etmədən rahat alternativ təqdim edir və tədbir məkanına gələn avtomobillərin sayının, eləcə də parklanma yükünün azalmasına töhfə verə bilər.

"Baku ID biznes, startap və investisiya icmasını bir araya gətirən mühüm platformadır. Bizim üçün burada iştirak etmək həm bu mühitə dəstək vermək, həm də tədbir iştirakçılarının gediş-gəlişini daha rahat etmək imkanıdır," - Bolt for Business-in rəhbəri, Salman Babazadə bildirib.