İki ölkə liderlərinin siyasi iradəsi və qarşılıqlı dəstəyi sayəsində Azərbaycan ilə Slovakiya arasındakı münasibətlər qısa müddət ərzində yüksək strateji tərəfdaşlıq səviyyəsinə yüksəlib.

BAKU.WS" xəbər verir ki, bunu Milli Məclisin sədri Sahibə Qafarova Slovakiyanın Konstitusiya Günü və Silahlı Qüvvələr Gününə həsr olunmuş tədbirdə bildirib.

Onun sözlərinə görə, ikitərəfli əlaqələr qarşılıqlı dostluq, hörmət və etimada əsaslanır, son illərdə isə onların intensiv inkişafı müşahidə olunur.

S.Qafarova qeyd edib ki, Azərbaycan Prezidenti İlham Əliyevin 2025-ci ilin dekabrında Slovakiyaya rəsmi səfəri, eləcə də Slovakiya Prezidenti Peter Pelleqrininin və Baş nazir Robert Fitsonun Azərbaycana səfərləri ikitərəfli münasibətlərə yeni təkan verib.

O vurğulayıb ki, ümumi maraqlar və qarşılıqlı dəstək Azərbaycan-Slovakiya strateji tərəfdaşlığının mühüm xüsusiyyətləridir.

S. Qafarovanın sözlərinə görə, ikitərəfli münasibətlər iqtisadiyyat, ticarət, energetika, qarşılıqlı investisiyalar, hərbi-texniki əməkdaşlıq, təhsil və parlament əlaqələri daxil olmaqla müxtəlif istiqamətlərdə fəal şəkildə inkişaf edir. O əlavə edib ki, yeni təşəbbüslər iki ölkə arasında əməkdaşlığın daha da genişlənməsinə töhfə verəcək.