Azərbaycanəsilli rusiyalı repçi Navai Bəkirov Qazaxıstanda saxlanıldıqdan sonra daha bir maddə üzrə məsuliyyətə cəlb oluna bilər. Onun 7 il müddətinə sürücülük hüququndan məhrum edilməsi və 15 sutkalıq inzibati həbsə göndərilməsi ehtimalı var.

BAKU.WS xəbər verir ki, bu barədə "Mash" Telegram kanalı məlumat yayıb.

Məlumata görə, aparılan analizlərin nəticələrində reperin qanında qadağan olunmuş maddələr aşkarlanıb.

Bildirilir ki, Navai Qazaxıstandakı "Korday" sərhəd-keçid məntəqəsində saxlanılarkən "Mercedes" markalı avtomobili özü idarə edib. Bu səbəbdən onun narkotik maddənin təsiri altında nəqliyyat vasitəsini idarə etməkdə ittiham olunması məsələsi gündəmə gəlib.

Belə bir halda repçi Qazaxıstanın İnzibati Xətalar Məcəlləsinin 608-ci maddəsi ilə məsuliyyətə cəlb edilə bilər. Bununla yanaşı, hüquq-mühafizə orqanları narkotik vasitələrin satış məqsədi olmadan qanunsuz dövriyyəsi və qaçaqmalçılığı ilə bağlı işi də araşdırır.

Qeyd olunan əməllərlə bağlı iş üzrə Navaini 5 ilədək həbs və ya 5 min aylıq hesablama göstəricisinədək (AHG) cərimə gözləyə bilər. Qazaxıstanda bir AHG 4 325 tengeyə, təxminən 15-16 manata bərabərdir.

Hazırda Navai barəsində yekun qərar verilməyib. Bu gün onunla bağlı qətimkan tədbirinin seçilməsi məsələsinə baxılması gözlənilir.

Qeyd edək ki, sadalanan cəzalar hələlik ehtimal xarakteri daşıyır və sənətçinin təqsiri barədə yekun hüquqi qərar açıqlanmayıb.