Azərbaycanın Avropa ilə münasibətlərinin pozulması mümkün deyil, xüsusilə iqtisadi çərçivədə bu baş verməyəcək.

“AVESTA.AZ” xəbər verir ki, bunu Bakı Politoloqlar Klubunun rəhbəri Zaur Məmmədov “Azərbaycan və BRICS: imkanlar və perspektivlər” adlı tədbirdə “BRICS və Azərbaycan iqtisadi əməkdaşlıq və prioritetlər” mövzusunda çıxış edərkən deyib.

Onun sözlərinə görə, Azərbaycan BRICS-dən siyasi mənfəət əldə edə bilər:

"Azərbaycanın əsas ticarət partnyoru Türkiyə və Avropadır. Son 30 ildə ticarət dövriyyəmizin statistikasında Qərb ölkələri birinci yeri tutur. Azərbaycan BRICS-dən siyasi mənfəət əldə edə bilər. Ancaq bu o demək deyil ki, bu quruma üzv olmaqla dünyaya qarşı çıxılır. Azərbaycan nə qədər çox təşkilata üzv olsa, bir o qədər siyasi dividend qazana bilər”.

Qeyd edək ki, BRICS (BRİKS) 2001-ci ildə yaradılıb, Braziliya, Rusiya, Hindistan, Çin, Cənubi Afrika Respublikası, Misir, Efiopiya, İran və Birləşmiş Ərəb Əmirliklərini özündə birləşdirən hökumətlərarası təşkilatdır.

Əvvəlcə investisiya imkanlarını müəyyən edən qruplaşma hökumətləri 2009-cu ildən bəri hər il rəsmi sammitlərdə toplaşan və çoxtərəfli siyasətləri koordinasiya edən vahid geosiyasi bloka çevrilib. BRICS arasında ikitərəfli əlaqələr əsasən müdaxilə etməmək, bərabərlik və qarşılıqlı fayda əsasında aparılır.