ABŞ-nin Fred Xatçinson adına Xərçəng Xəstəliyini Araşdırma Mərkəzinin alimləri parodontal xəstəlik zamanı ağızda çox rast gəlinən “Fusobacterium nucleatum” bakteriyasının bağırsaqlarda şişlərin böyüməsini stimullaşdıra biləcəyini aşkar ediblər.

"AVESTA.AZ" xəbər verir ki, araşdırmanın nəticələri “Nature” jurnalında dərc olunub.

Alimlər tədqiqat zamanı parodontal xəstəlikləri olan insanların ağız mikrobiomunun (bütün mikroorqanizmlərin məcmusu) tərkibini — diş əti iltihabı, pariodontit, parodontal xəstəlik və bağırsaq xərçəngini təhlil ediblər. Elmi işlərdə bu xəstəliklər olmadan könüllülərin sağlamlıq vəziyyəti haqqında məlumatlar da iştirak edib.

Tədqiqatçılar müəyyən ediblər ki, diş əti xəstəliyi olan insanlarda rast gəlinən “fusobacterium nucleatum” (F. nucleatum) bakteriyası bəzi növ bağırsaq xərçəngi şişlərində də var. “Fna” adlanan spesifik “F. Nucleatum” ştammına ən çox bədxassəli şişlərdə rast gəlinir.

Alimlər daha dərin araşdırmadan sonra iki növ “Fna” müəyyən ediblər. Lakin yalnız bir növ “Fna C2”, yoğun bağırsaq xərçəngi ilə əlaqələndirilib. Siçanlar üzərində aparılan əlavə təcrübələr göstərdi ki, gəmiricilərin “Fna C2” ilə yoluxması onlarda bu xəstəliyin inkişafına səbəb olub.

Tədqiqatçılar “Fusobacterium nucleatum”un həzm sistemində inkişaf edə biləcəyini və xüsusi (hələ öyrənilməmiş) mexanizmlərdən istifadə edərək şişin böyüməsini stimullaşdıra biləcəyini güman ediblər.