Atom Enerjisi üzrə Beynəlxalq Agentliyinin (AEBA) baş direktoru Rafael Qrossi BMT Təhlükəsizlik Şurasına Ukraynanın Rusiya hərbçiləri tərəfindən ələ keçirilmiş Zaporojye Atom Elektrik Stansiyasında (AES) nüvə təhlükəsizliyi və mühafizə zonası yaratmağı təklif edib.

“Report” xəbər verir ki, Qrossi bu barədə tviterdəki mikrobloqunda yazıb.

"Mən yenicə BMT Təhlükəsizlik Şurasına müraciət etmişəm və Zaporojyedə nüvə təhlükəsizliyi və təhlükəsizlik zonasının yaradılması təklifi ilə çıxış etmişəm. Bu, bizim yeni hesabatımızda qeyd olunduğu kimi, nüvə stansiyasındakı missiyamızın nəticələrinə əsaslanır", - Qrossi vurğulayıb.

"Mövcud vəziyyət qəbuledilməzdir. Ukrayna, onun xalqı üçün təhlükəsizliyin yaradılması və nüvə obyektlərinin qorunması üçün ən yaxşı tədbir bu silahlı münaqişənin dərhal dayandırılması olardı", - AEBA-nın baş direktoru bildirib.

"Bu baş verənə qədər hərbi vasitələrlə törədilən nüvə qəzasının qarşısını almaq üçün təcili müvəqqəti tədbirlər görmək lazımdır. Buna dərhal təhlükəsizlik zonasının yaradılması ilə nail olmaq olar. Biz nüvə təhlükəsizliyinin yaradılmasına gətirib çıxaracaq məsləhətləşmələrə və mühafizə zonasına dərhal başlamağa hazırıq”, - Qrossi qeyd edib.