“Sadəcə 2018-ci ilində dünyada 2 milyon 300 min qadına südvəzi xərçəngi diaqnozu qoyulub və 627 min qadın bu səbəbdən vəfat edib”.

“AVESTA.AZ” xəbər verir ki, bunu Liv Bona Dea Hospitalının Uzman həkimi Ceyhun İsayev “Türk-Azərbaycan qardaşlığının 360 dərəcə dəyərləndirilməsi” tədbirində çıxışı zamanı deyib.

Həkim qeyd edib ki, biz savaşdan danışıb, ondan qorxuruq, amma süd vəzi xərçəngi daha çox insanın həyatına son qoyur:

“Məsələn, Suriyadakı 11 illik savaş 610 min nəfərin həyatına son qoyub. Xərçəngin digər növləri bir kənara, təkcə süd vəzi xərçəngi 1 il ərzində 627 min qadının həyatına son verib. Bizim əsas məqsədimiz bunun qarşısını almaqdır. Süd vəzi xərçəngi tamamilə sağalan bir xəstəlikdir. Lakin bunun üçün əsas şərt erkən diaqnozdur”.

C.İsayev vurğulayıb ki, 10 il əvvəl əməliyyat etdiyi xəstənin hazırda səhhətində heç bir problem yoxdur:

“Səbəb isə erkən diaqnozdur. Radiologiya sahəsinin inkişaf etməsilə süd vəzi xərçəngindən ölüm saylarında ciddi şəkildə azalma var. Hazırda Amerika və Avropada statistikaya baxanda süd vəzi xərçənginə daha çox rast gəlindiyini görürük, lakin ölüm faizi daha aşağıdır. Bunun da səbəbi cəmiyyətin erkən diaqnozla bağlı maariflənmiş olmasıdır. Ona görə də bu ölkələrdəki xəstələrin xərçəngdən sağalma şansları daha çoxdur”.