Suriya ordusunun komandanlığı Hələb əyaləti mərkəzinin qərbində (Dəməşqdən 360 km) yerləşən qanunsuz silahlıların mövqelərinə zərbələr endirmək üçün pilotsuz uçuş aparatlarından (PUA) istifadə edib.

"Report" xəbər verir ki, bu barədə " Al Watan" qəzeti məlumat yayıb.

Məlumata görə, Takad rayonunda "Cəbhət ən-Nusra" ekstremist qruplaşmasının qərargahına və kazarmasına pilotsuz təyyarələrin hücumu nəticəsində dörd terrorçu məhv edilib. Daha altı silahlı Daret-İzza şəhəri yaxınlığında məhv edilib. Yaralanan yeddi terrorçu Türkiyənin İdlibdəki Xəstəxanasına aparılıb.

Suriya qoşunları artilleriyası Cebel-əz-Zaviya dağlıq ərazisindəki quldur dəstələrinin arxa bazalarına atəş açıb. Afes, Deyr-Sinbul, Kensarfa, Sufuhan və Fleyfil yaşayış məntəqələri atəşə tutulub.

Nəşr qeyd edib ki, bu hücumlar hökumət qüvvələrinin himayəsində olan yaşayış məntəqələrinə silahlı basqınlara cavab olaraq edilib. Mayın əvvəlindən 40-dan çox insan Suriyanın şimal-qərbindəki "Cəbhət ən-Nüsra" və onun müttəfiqlərinin silahlı hücumlarının qurbanı olub.