Bəzi insanlar ağ və qəhvəyi yumurtaların tərkibindəki qida maddələrinin fərqli olduğunu düşünür. Lakin alimlər bu inancın doğru olmadığını bildirirlər.

AVESTA.AZ xəbər verir ki, əslində, bu yumurtalar yalnız qabıqlarının rənginə görə fərqlənir.

Yumurta qabığının rəngi nəyi göstərir?
Mütəxəssislərin sözlərinə görə, yumurtanın qabıq rəngi toyuq cinsindən asılıdır və onun nə dadına, nə də qida dəyərinə təsir edir. Yumurtanın keyfiyyəti daha çox toyuğun yaşadığı mühitdən, bəslənməsindən və yumurtanın təravətindən asılıdır.

Dünyada 1600-dən çox toyuq cinsi mövcuddur və onların yumurtaları təkcə ağ və qəhvəyi deyil, həm də göy, yaşıl, çəhrayı, krem rəngli və hətta ləkəli ola bilər. Qabığın rəngi yumurtanın formalaşdığı 26 saatlıq prosesdə müəyyən edilir.

Sarı dənəsinin rəngi nə üçün fərqlidir?
Yumurtanın sarısının rəngi toyuğun yediyi yemə bağlıdır. Sarının çaları açıq sarıdan tünd narıncıya və hətta qırmızıya qədər dəyişə bilər. Qida dəyəri isə toyuq cinsindən, yaşından, yemindən və saxlanma şəraitindən asılıdır, qabıq rəngindən deyil.

Niyə qəhvəyi yumurtalar daha bahalıdır?
Qəhvəyi yumurtalar adətən iri cüssəli toyuqlardan alınır. Bu cür toyuqlar daha çox yem yeyir və daha böyük sahəyə ehtiyac duyur. Nəticədə, onların saxlanması daha baha başa gəlir və bu da yumurtanın qiymətinə təsir edir.

Yumurta alarkən nələrə diqqət etməli?

1. Keyfiyyət: ABŞ-da yumurtalar USDA standartlarına görə təsnif edilir. AA dərəcəli yumurtalar ən təzə və keyfiyyətli sayılır. A dərəcəli yumurtalar bir qədər aşağı keyfiyyətlidir. B dərəcəlilər isə daha çox bişirmə üçün uyğundur.

2. Ölçü: Yumurtalar kiçikdən çox böyüyə qədər fərqli ölçülərdə olur. Daha çox zülal qəbul etmək istəyənlər böyük yumurtaları seçə bilərlər.

3. Orqanik: Orqanik yumurtalar kimyəvi əlavələrsiz yemlə bəslənən, qəfəssiz mühitdə saxlanılan toyuqlardan əldə edilir.

4. Sərbəst gəzən toyuqların yumurtaları: Araşdırmalar göstərir ki, sərbəst gəzən toyuqlardan alınan yumurtalar fabrik toyuqlarının yumurtalarına nisbətən iki dəfə daha çox omega-3 və E vitamini ehtiva edir.