Xəzər və Mərkəzi Asiya regionunun hava yolu ilə aparıcı yükdaşıma şirkəti olan Silk Way West Airlines ölkə iqtisadiyyatının şaxələndirilməsi və maliyyə sabitliyindəki mühüm roluna görə Azərbaycan Respublikasının İqtisadiyyat Nazirliyi yanında Dövlət Vergi Xidməti tərəfindən qeyri-neft sektoru üzrə ölkənin ən böyük vergi ödəyicisi kimi təltif edilib. Silk Way West Airlines şirkətinin ölkənin iqtisadi artımı, maliyyə şəffaflığı və vergi qanunvericiliyinə uyğun fəaliyyət öhdəliklərinə sadiqliyi yüksək qiymətləndirilib.

Hava yolu ilə aparıcı beynəlxalq yükdaşıma şirkəti olan Silk Way West Airlines  Azərbaycanda aviasiya sahəsi və logistika sektorunun inkişafında əhəmiyyətli rol oynayıb. Vergi öhdəliklərini davamlı olaraq yüksək səviyyədə yerinə yetirən Silk Way West Airlines dövlət büdcəsinin sabitliyinin gücləndirilməsi və bir sıra milli iqtisadi təşəbbüslərin dəstəklənməsi ilə ölkənin fiskal dayanıqlılığına töhfə verib. Aviaşirkətin beynəlxalq maliyyə və vergi standartlarını əldə rəhbər tutması onun uzunmüddətli inkişaf və dayanıqlı iqtisadi təsirə olan strateji yanaşmasını əks etdirir.

Silk Way West Airlines şirkətinin töhfələri aviasiya sahəsinin hüdudlarını aşaraq bilavasitə Azərbaycanın makroiqtisadi göstəricilərinə təsir göstərir. Şirkətin vergi ödəmələri iqtisadiyyatın şaxələndirilməsi üzrə strateji məqsədlərə uyğunlaşaraq vacib infrastrukturun genişləndirilməsi, məşğulluğun artırılması və qeyri-neft sənayesinin inkişafına dəstək verib. Nəqliyyat və logistika sektorunda xüsusi çəkisi olan Silk Way West Airlines ticarət həcminin artmasını təmin edib, Azərbaycanın qlobal logistika mərkəzi kimi mövqeyini möhkəmləndirib və beynəlxalq iqtisadi tərəfdaşlıqları gücləndirib.

Silk Way West Airlines şirkətinin prezidenti Volfqanq Mayer qeyd edib ki, vergi inzibatçılığının təkmilləşdirilməsi və şəffaflığın təşviqi naminə həyata keçirilən islahatlar ölkənin iqtisadi mühitinə müsbət təsir göstərərək aviasiya və hava yolu ilə yükdaşımalar kimi sahələrin inkişaf etməsinə şərait yaradıb: "Bu nailiyyət bizim korporativ məsuliyyətə, iqtisadi artıma və dayanıqlı inkişafa sadiqliyimizdən xəbər verir. Ölkənin qeyri-neft sektoru üzrə aparıcı vergi ödəyicisi kimi tanınmaqdan böyük qürur duyuruq. Azərbaycanın inkişaf etməsinə töhfə verməyə davam edəcəyik".

Fəaliyyətini genişləndirməyə davam edən Silk Way West Airlines ən yüksək maliyyə idarəetmə standartlarının dəstəklənməsinə sadiq qalaraq Azərbaycanın iqtisadi tərəqqisini təmin edən aparıcı qüvvə kimi öz mövqeyini gücləndirməyə davam edir. Şirkətin fəaliyyətinə verilən bu qiymət ölkənin maliyyə sabitliyini və sənaye inkişafının gücləndirilməsində etibarlı tərəfdaş kimi onun mövqeyini daha da möhkəmləndirir.

Əsası 2012-ci ildə İpək yolunun qəlbi sayılan Bakıda qoyulmuş Silk Way West Airlines şirkəti Heydər Əliyev Beynəlxalq Hava Limanı mərkəzli 12 müasir "Boeing 777F", "Boeing 747-8F" və "Boeing 747-400F" yük təyyarəsindən ibarət donanması ilə dünyanın müxtəlif ölkələrinə hər ay yüzlərlə uçuş həyata keçirir. 

Dayanıqlılıq və səmərəlilik öhdəliyinə uyğun olaraq, Silk Way West Airlines qlobal logistika tələblərinə daha yaxşı cavab vermək məqsədilə dörd "Boeing 777F", iki "Boeing 777-8F" və iki "Airbus A350F" daxil olmaqla öz donanmasını 2030-cu ilədək səkkiz yeni ən müasir təyyarə ilə yeniləməyi planlaşdırır.

Aviaşirkətin illik yükdaşıma dövriyyəsi 500 min tondan artıqdır, genişlənən marşrut şəbəkəsi isə Avropa, MDB ölkələri, Yaxın Şərq, Asiya və Amerika qitəsi üzrə 40-dan çox istiqaməti əhatə edir.