Vanqa dünyanın ən çox tanınan və etibar edilən öncəgörənlərindən biri hesab olunur.

BAKU.WS Ruskaya semerka-ya istinadən xəbər verir ki, onun bir çox proqnozları gerçəyə çevrilsə də, bu faktı onun ən sadiq pərəstişkarları belə inkar etmir ki, Vanqanın bütün dedikləri həqiqətə uyğun gəlməyib.

Vanqa fenomenini araşdıran müxtəlif tədqiqatçılar onun proqnozlarının düzgünlük faizini fərqli hesablayırlar. Yazıçı Aleksey Rakitin "Sirlərsiz sirlər" adlı kitabında iddia edir ki, Vanqa min proqnozdan yalnız 300-də yanılıb. Bolqar araşdırmaçılar isə 7 minə yaxın proqnozu təhlil edərək onların yalnız 20 faizinin gerçəkləşmədiyini bildiriblər. Sosioloq Veliçko Dobrıyanov isə Vanqanın proqnozlarının 68 faizinin doğruluğunu qeyd edir, lakin bu proqnozların yarısının müxtəlif cür yozula biləcəyini də vurğulayır.

Bəzi "doğru" hesab edilən proqnozlara aid heç bir sənədli sübut yoxdur. Onların sırasında Stalinin ölümü, Çernobıl faciəsi, Boris Yeltsinin 1996-cı il seçkilərində qələbəsi, 11 sentyabr 2001-ci il terror aktları və şahmatçı Veselin Topalovun çempionluğu da var. Vanqanı yaxından tanıyanlar isə iddia edirlər ki, o, nə "Kursk" sualtı qayığının batması, nə də Fukuşima AES-dəki qəza barədə heç nə deməyib. Belə "doğru" proqnozların çoxu uydurma və mif kimi dəyərləndirilir.

Vanqa bəzən açıq şəkildə yanılırdı. Məsələn, 1970-ci illərdə onun Sovet İttifaqının Çiliyə ordu yeridəcəyini söylədiyi iddia olunur. Lakin məsafənin uzaqlığı səbəbindən SSRİ rəhbərliyi bu fikirdən imtina edib. Həmçinin, yazıçı Svetlana Kudryavtsevanın məlumatına görə, Vanqa 1990-cı illərdə ABŞ-nin 41-ci prezidenti Corc Buşun təyyarə partlayışında öləcəyini demişdi. Halbuki Buş 2018-ci ildə yaşlılıq və Parkinson xəstəliyindən vəfat edib.

Bəzi mistiklər Vanqanın səhvlərini "gələcəyin dəyişkən olması" ilə izah etməyə çalışsalar da, Vanqa özü gələcəyin dəyişdirilə bilməyəcəyinə inanırdı. Bu isə bir çox ziddiyyətli suallar doğurur.