Bakı Ağır Cinayətlər Məhkəməsində Azərbaycan Milli Elmlər Akademiyasının (AMEA) Riyaziyyat və Mexanika İnstitutunun direktor müavini, professor Soltan Əliyevə qarşı dələduzluqda ittiham olunan Səadət Xəlilovun cinayət işi üzrə məhkəmə prosesi davam edib.

Avesta xəbər verir ki, hakim Zeynal Ağayevin sədrliyi ilə keçirilən prosesdə təqsirləndirilən şəxsə hökm oxunub.

Bundan əvvəl təqsirləndirilən şəxs son söz deyib. Daha sonra məhkəmə müşavirəyə yollanıb. Müşavirədən sonra təqsirləndirilən şəxsə hökm oxunub. Məhkəmənin hökmü ilə Səadət Xəlilov 9 il azadlıqdan məhrum edilib.

Xatırladaq ki, prokuror Səadət Xəlilovun 9 il 6 ay azadlıqdan məhrum edilməsini istəmişdi.

Qeyd edək ki, itihama əsasən, Səadət Xəlilov, Qulu Muxtarov və Sahil Abuşov onun 2 milyon manatını ələ keçirib. Səadət Xəlilov həbsdə olsa da, digər iki təqsirləndirilən məhkəmə dövründə azadlıqda olublar. Ötən ilin dekabr ayında keçirilən məhkəmə iclaslarına gəlmədiklərinə görə onlar haqqında axtarış elan edilərək hər ikisi həbs edilib. Bundan sonra Qulu Muxtarov və Sahil Abuşovun işi Səadət Xəlilovun işindən ayrılıb. Səadət Xəlilov hazırda tək mühakimə olunur.

S.Xəlilov Cinayət Məcəlləsinin 178.3.2 (külli miqdarda ziyan vurmaqla dələduzluq) maddəsi ilə ittiham olunur.

"Bakı Metropoliteni"nin keçmiş rəisi T.Əhmədov yaxın dostu Soltan Əliyev vasitəsilə Səadət Xəlilov və onun tanışlarına 2 milyon manata yaxın sələm verib. Belə ki, onlar mərmər biznesində böyük qazanc olduğunu deyərək Əhmədovu bu işə pul yatırmağa inandırıblar. Sabiq rəis pulların bir qisimini rəhbəri olduğu YAP-ın Yasamal rayon təşkilatının binasında onlara verib. Biznes uğurlu alınmadığından sələm qaytarılmayıb. Nəticədə tərəflər arasında mübahisə yaranıb və dələduzluq ittihamı ilə S.Xəlilova qarşı cinayət işi başlanılıb.

Cinayət işi üzrə Soltan Əliyev zərərçəkmiş qismində tanınsa da, Səadət Xəlilov 2 milyon manatı Bakı Metropolitenin sabiq rəisi Tağı Əhmədovun onlara faizlə verdiyini deyib.