İqlim dəyişiklikləri və son dövrlər baş verən geosiyasi proseslər səbəbindən dünya bazarlarında əsas ərzaq mallarının qiymətlərində davamlı artım qeydə alınır, habelə qonşu ölkələrin bazarlarında həmin malların logistika-təchizat zəncirində problemlər yaranır. Həmin problemlərin Azərbaycanda yaşanmaması üçün Baş nazir Əli Əsədov “Minimum istehlak səbətinin tərkibinə daxil olan bir sıra əsas ərzaq mallarının və onların istehsalında istifadə olunan malların ölkə ərazisindən aparılmasının tənzimlənməsinə dair tədbirlər haqqında” qərar imzalayıb. Sənəddə müəyyən edilib ki, siyahısı müəyyən edilən ərzaq mallarının və onların istehsalında istifadə olunan malların gömrük ərazisindən aparılması ölkədə mövcud olan ehtiyatlar və əhalinin müvafiq mallar ilə qısamüddətli dövrdə təminatı ilə bağlı proqnoz əsas götürülməklə İqtisadiyyat Nazirliyinin müsbət rəyi əsasında həyata keçiriləcək.

Məsələ ilə bağlı Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov "Report"a bildirib ki, Nazirlər Kabinetinin son qərarı daxili bazarı qorumaq, ərzaq və təminatda stabilliyi tam təmin etmək məqsədi daşıyır.

Onun sözlərinə görə, bu qərar hər hansı bir ərzaq qıtlığının olması anlamına gəlmir:

"Dünya və region bazarında bir sıra ərzaq məhsullarının qıtlığı müşahidə edilir. Bu baxımdan da ölkəmizdə preventiv tədbirlərin həyata keçirilməsinə ehtiyac var. Bunu etməkdə isə məqsəd minimum istehlak səbətinə daxil olan ərzaq məhsulları üzrə həm ehtiyatlarının genişləndirilməsi, həm də bütövlükdə ərzaq təminatında stabilliyinin tam olaraq qorunub saxlanılmasına nail olmaqdır. Azərbaycan hökuməti öncədən də ərzaq təhlükəsizliyi məsələsini prioritetləşdirmişdi. Ona görə də ərzaqla təminatda hər hansı bir çətinlik müşahidə edilməmişdi. Ancaq növbəti dövrlərdə region bazarında ərzaq qıtlığı probleminin artacağını nəzərə alaraq qabaqlayıcı tədbirlərin həyata keçirilməsi olduqca vacibdir".

"Bu zaman İqtisadiyyat Nazirliyi tərəfindən ixrac olunacaq məhsulların ehtiyatlarına baxılacaq. Əgər həmin məhsulların ölkə daxilində ehtiyatları çoxdursa həmin məhsulların ixracatında hər hansı bir problem olmayacaq. Ancaq həmin məhsulun ixracatı bütövlükdə ehtiyatların formalaşdırılmasına mənfi təsir göstərsə bu zaman onun ölkədən çıxarılması arzuolunan hesab edilməyəcək. Həm də bu zaman bütövlükdə hökumət tərəfindən üç aylıq ehtiyatlara baxılacaq və buna təsir göstərə biləcək faktorlar nəzərə alınacaq".

V.Bayramova qeyd edib ki, fiziki şəxslər tərəfindən də məhsulların aparılması ilə bağlı hər hansı bir qadağa yoxdur:

"Hesab edirəm ki, bu qərarın qəbul edilməsi hər hansı bir ərzaq qıtlığının olması anlamına gəlmir. Məqsəd daxili bazarın qorunması, təminatın sabitliyinin təmin olunmasıdır. Hökumət əsas ərzaq məhsulları ilə təminata dair zəruri tədbirləri görür və bu tədbirlər ən zəruri qida məhsulları ilə bağlı qıtlığın olmayacağına təminat vermək iqtidarındadır. Onu da qeyd edim ki, ölkədə hər hansı zəruri ərzaq məhsulu ilə bağlı qıtlıq yoxdur və gözlənilmir. Qərar bütövlükdə vəziyyətin, xüsusən də ehtiyatların genişləndirilməsinin tənzimlənməsi və bütövlükdə proseslərin növbəti dövrlərdə də nəzarətdə olması, daxili bazarın qorunması, vətəndaşlarımızın ərzaq təminatı və təhlükəsizliyinin gücləndirilməsinə xidmət edir. Bu baxımdan da qərar ilin sonunadək qüvvədə olacaq. Növbəti dövrlərdə də ərzaq təminatının gücləndirilməsi, ərzaqla bağlı ehtiyatlarımızın genişləndirilməsi hökumət üçün prioritet olacaq. Azərbaycan hökuməti qabaqlayıcı tədbirlərlə dünya bazarında baş verən qiymət artımlarının, ərzaq qıtlığının daxili bazarda təsirlərini minimumlaşdırmağa çalışır".