Azərbaycanda xüsusilə məktəblərin "Son Zəng" mərasimlərində, eləcə də adi günlərdə yeniyetmələrin avtomobil idarə etməsi hallarına rast gəlinir.

AVESTA.AZ-in məlumatına görə, 18 yaşına çatmamış bu yeniyetmələr valideyn nəzarəti olmadan sükan arxasına keçir, bəzən qəza törədir, bəzən də digər insanların həyatını təhlükə altına atırlar.

Bu hallar təkcə qanun pozuntusu deyil, həm də cəmiyyət üçün ciddi təhlükə mənbəyidir.

Baş DYP İdarəsinin baş inspektoru polis baş leytenantı Elvin Hacıyev də AVESTA.AZ-ə açıqlamasında bildirib ki, sürücülük hüququ olmayan, eləcə də yetkinlik yaşına çatmayan uşaqların sükan arxasında əyləşməsi ilə bağlı faktlara hələ də rast gəlinir:

"Zaman-zaman bəzi orta ümumtəhsil məktəblərində oxuyan yuxarı sinif şagirdlərinin məktəblərə avtomobillərə gəlməsinə dair məlumatlar da eşidilir.

Təhlükəsizliyin təmin olunması üçün yol polisi əməkdaşları tərəfindən təhsil müəssisələrində həm valideynlərlə, həm də məktəblərlə tez-tez maarifləndirici tədbirlər keçirilsə də, yenə də azyaşlı uşaqlarına sükan arxasına keçməyə icazə verən valideynlərə rast gəlinir.

Bəzi valideynlər özləri övladlarının avtomobil idarə etməyə öyrətdiklərini, onların hər şeyə hazır olduqlarını zənn edir. Amma yol hərəkəti qaydalarını bilməyən uşaqların ekstremal durumlarda aciz qalacaqlarını, məsələnin nə qədər ciddi olduğunu unudurlar. Bir uşağın avtomobil sürmək həvəsi həm özünün, həm də valideynlərin arzularını yarıda qoya bilər. Belə hallara qətiyyən yol vermək olmaz. Bu əməllər qanunla qadağan olunur, məsuliyyət yaradır və eyni zamanda bütün hərəkət iştirakçıları üçün ciddi təhlükə deməkdir. Bir daha valideynləri övladlarını nəzarətsiz qoymamağa çağırırıq".

Qeyd edək ki, Azərbaycanda yol hərəkəti haqqında qanunlara əsasən, avtomobil idarə etmək hüququ yalnız 18 yaşını tamamlamış və sürücülük vəsiqəsinə malik şəxslərə verilir. Əks halda, bu, inzibati xətadır və həm sürücüyə, həm də avtomobili ona etibar edən valideyn və ya sahibinə qarşı cəza tədbirləri tətbiq olunur. Bu cəzalara pul sanksiyaları və nəqliyyat vasitəsinin cərimə meydançasına aparılması daxildir.

Orxan Hüseyn