Yay aylarının ayrılmaz hissəsi olan dondurma həm uşaqların, həm də böyüklərin sevimli ləzzətlərindəndir. Bəs bu dadlı və sərinləşdirici məhsul sağlamlığa necə təsir edir? Dondurmanın faydaları, riskləri və düzgün istehlakı barədə mütəxəssislər nə deyir?

BAKU.WS dondurma istehlakı barədə bilməli olduğunuz bəzi detalları təqdim edir:

Dondurmanın faydaları

Dondurma, xüsusilə təbii süddən hazırlandıqda, bir sıra qida maddələri ilə zəngindir. Aşağıdakılar ən mühüm faydalarındandır:   Kalsium və Fosfor: Sümük və dişlərin inkişafı üçün əsas elementlər.   Zülal: Uşaqların böyüməsi və toxuma bərpasında vacibdir.   B2 və B12 vitaminləri: Enerji mübadiləsini və sinir sisteminin funksiyasını dəstəkləyir.   Yüksək enerji: Fiziki aktiv uşaqlar və idmanla məşğul olan yeniyetmələr üçün tez enerji mənbəyidir.   Mütəxəssislər bildirir ki, gündəlik tələbat çərçivəsində qəbul edilən təbii dondurma faydalı ola bilər. Xüsusilə ev şəraitində hazırlanan və ya konservantlardan uzaq olan məhsullara üstünlük verilməlidir.  

Uşaqlar üçün nə qədər uyğundur?

Dondurma uşaqlar üçün zərərli deyil, lakin miqdar və vaxt diqqətlə seçilməlidir. Pediatrların tövsiyəsinə görə:   2-5 yaş: Həftədə 1-2 dəfə, 50 qramadək   6-12 yaş: Həftədə 2-3 dəfə, 70-100 qram   13+ yaş: Orta miqdarda, gündəlik şəkər miqdarı nəzərə alınmaqla   Dondurma əsas yeməkdən sonra verilməli, acqarına və ya səhər saatlarında verilməməlidir. Boğaz sağlamlığı üçün bu çox önəmlidir.   Həkimlər deyir ki, çox soyuq dondurma istehlakı boğaz və diş sağlamlığı üçün problem yarada, boğaz ağrısı və anginanın yaranmasına səbəb ola, dişləri həssas olan insanlarda ağrıya yol aça, soyuq məhsullar mədə-bağırsaq narahatlıqlarını artıra bilər.   Tövsiyə edilir ki, dondurma soyuducudan çıxarıldıqdan sonra bir neçə dəqiqə gözlənilsin və çox soyuq halda yeyilməsin.  

Marketdəki dondurmalar: Hansını seçək?

Tərkibində süni dadlandırıcılar, rəngləndiricilər və bitki yağları olmayan məhsulları seçin. Qatılaşdırılmış süd və təbii vanil olan məhsullar daha yaxşı seçimdir. Təravətinə və saxlanma şəraitinə baxın – bir dəfə əridilib dondurulan məhsullar təhlükəlidir.