Ermənistanda İrəvan məhkəməsi ölkədə hakimiyyətin devrilməsinə açıq çağırışlar etməkdə təqsirləndirilən Erməni Apostol Kilsəsinin Şirak Yeparxiyasının rəhbəri, arxiyepiskop Mikael Adjapaxyanın həbsdə qalma müddətini daha bir ay uzadıb.

AVESTA.AZ Oxu.Az-a istinadən xəbər verir ki, sentyabrın 2-də keçirilmiş məhkəmə iclasında prokuror həbs müddətinin uzadılması ilə bağlı vəsatət qaldırıb.

Məhkəmə qərarını arxiyepiskopun bu hərəkəti yenidən törətmək riskinin olması ilə əsaslandırıb. Hakim iş üzrə növbəti iclası sentyabrın 15-nə təyin edib.

Xatırladaq ki, iyunun 26-da Ermənistan Baş Prokurorluğu arxiyepiskopa qarşı konstitusiya quruluşunun devrilməsinə çağırış ittihamı ilə cinayət işi açıb. O, iyunun 27-də həbs edilib, iyunun 28-də isə ümumi yurisdiksiya məhkəməsinin qərarı ilə barəsində iki ay müddətinə həbs qətimkan tədbiri seçilib.