Güclü və ya uzunmüddətli stress görmə funksiyalarına mənfi təsir göstərə və bəzi hallarda ciddi görmə problemlərinə səbəb ola bilər.

AVESTA.AZ-in məlumatına görə, tam və geri dönməz korluq yalnız emosional gərginlik nəticəsində yaranmasa da, stress orqanizmdə baş verən reaksiyalar vasitəsilə görməyə təsir edə bilir.

Qeyd olunur ki, stress zamanı orqanizmdə kortizol hormonunun səviyyəsinin artması göz damarlarının fəaliyyətinə təsir edir. Bu isə bəzi hallarda torlu qişa altında maye toplanmasına, görüntünün bulanıqlaşmasına, görmə sahəsində ləkələrin yaranmasına və əşyaların təhrif olunmuş şəkildə görünməsinə səbəb ola bilər. Belə hallar xüsusilə yüksək stress və narahatlıq yaşayan insanlarda daha çox müşahidə edilir.

Bundan əlavə, uzunmüddətli əsəb gərginliyi "quru göz" sindromunu və göz qapaqlarında qeyri-iradi spazmları da yarada bilər. Stress zamanı insanın göz qırpma tezliyi azalır, göz yaşı təbəqəsinin tərkibi dəyişir və nəticədə gözlərdə quruluq, yanma və yorğunluq hissi meydana çıxır.

Mütəxəssislər bildirirlər ki, davamlı gərginlik bəzi insanlarda "yalançı yaxıngörmə" kimi tanınan akkomodasiya spazmına da səbəb ola bilər. Bu problem xüsusilə imtahan dövründə olan tələbələrdə və uzun müddət kompüter qarşısında çalışan ofis əməkdaşlarında daha çox rast gəlinir.

Bəzi hallarda isə ağır psixoloji travmalar fonunda "psixogen görmə itkisi" deyilən vəziyyət yarana bilər. Bu zaman insan görmə qabiliyyətini itirdiyini hiss etsə də, gözlərdə və beyində hər hansı fiziki zədələnmə aşkarlanmır. Mütəxəssislər qeyd edirlər ki, belə hallar adətən geri dönəndir və psixoloji dəstək tələb edir.

Həkimlər vurğulayırlar ki, stress birbaşa gözü zədələmir, lakin göz və beyin arasındakı əlaqənin fəaliyyətinə təsir göstərərək mövcud problemləri daha da ağırlaşdıra bilər. Bu səbəbdən görmədə qəfil zəifləmə və ya dəyişiklik hiss olunduqda vaxt itirmədən mütəxəssisə müraciət etmək tövsiyə olunur.