Yay mövsümündə ən çox istehlak olunan məhsullardan biri olan dondurmanı alarkən həm uşaqların, həm də böyüklərin sağlamlığını qorumaq üçün bir sıra vacib məqamlara diqqət yetirmək lazımdır.

AVESTA.AZ-in məlumatına görə, mütəxəssislər bildirirlər ki, ilk növbədə məhsulun son istifadə tarixi yoxlanılmalıdır. Vaxtı keçmiş və ya düzgün saxlanılmayan dondurma qida zəhərlənməsinə səbəb ola bilər.

Dondurmanın saxlanma şəraiti də mühüm əhəmiyyət daşıyır. Əgər məhsul əridikdən sonra yenidən dondurulubsa, onun forması dəyişir, üzərində buz kristalları yaranır və bu, məhsulun keyfiyyətinin pozulduğunu göstərir.

Uşaqlar üçün dondurma seçərkən tərkibində süni rəngləndiricilər və çoxlu qatqılar olan məhsullardan uzaq durmaq tövsiyə olunur. Süd tərkibli və daha təbii məhsullar uşaqlar üçün daha uyğun hesab edilir.

Böyüklərə isə şəkər miqdarı yüksək olan dondurmaları həddindən artıq istehlak etməmək məsləhət görülür. Xüsusilə şəkərli diabet, artıq çəki və ya boğaz həssaslığı olan şəxslər seçim zamanı diqqətli olmalıdırlar.

Mütəxəssislər küçədə açıq şəraitdə satılan, qablaşdırılmayan və mənşəyi məlum olmayan dondurmaların alınmasını riskli hesab edirlər. Məhsulun qablaşdırılması bütöv, üzərində istehsalçı məlumatları isə tam göstərilməlidir.

Həkimlər qeyd edirlər ki, dondurma düzgün seçildikdə və normada istehlak olunduqda həm uşaqlar, həm də böyüklər üçün yay aylarında təhlükəsiz və xoş desert ola bilər.