İyulun 12-si Aprel döyüşlərində şəhid olan "Murov Qartalı", şəhid polkovnik-leytenant Raquf Orucovun doğum günüdür.

BAKU.WS xatırladır ki, Azərbaycan Silahlı Qüvvələrinin polkovnik-leytenantı, Qarabağ müharibəsi qazisi Raquf Orucov 1972-ci ildə Ağdam rayonunun Cinli kəndində Raya və İbrahim Orucovların ailəsində anadan olub.

Ailənin birinci övladı olan Raqufun özündən başqa üç qardaşı və bir bacısı var idi. 1990-cı ildə sovet qoşunlarında xidmət edən Raquf Orucov bir müddət sonra ordudan ayrılmış, Azərbaycan Ordusunun sıralarına qoşulmuş, üç-dörd ay ərzində Fərrux dağı və Aranzəmin kəndində aparılan hərbi əməliyyatlar zamanı ayağından ağır qəlpə yarası almışdı. Onun anası Raya xanım 1993-cü il iyunun 12-də Ağdam rayonunun Cinli kəndinin işğalı zamanı həlak olub. Elə həmin ildən Raquf Orucov sənədlərini Bakı Ali Hərbi Ümumqoşun Komandirləri Məktəbinə verib, növbəti il həmin məktəbə qəbul ola bilib.

Raquf Orucov Bakı Ali Hərbi Ümumqoşun Komandirləri Məktəbində iki il ərzində lazımi biliklərə yiyələnib. 1996-cı ildə həmin məktəbi bitirən Raquf Orucov daha sonra Bakı şəhərində yerləşən hərbi hissələrin birinə təyinat alsa da, ön cəbhədə olmağa üstünlük verib. 1996-cı ildə təyinatını Murovdağa alıb və kəşfiyyat bölüyünün komandiri kimi fəaliyyətini davam etdirib.

2016-cı ilin aprel ayının əvvəlində polkovnik-leytenant Raquf Orucov sonuncu döyüşünə qatılıb. O gecə Vətənini, torpağını ailəsindən belə öndə tutan hərbçilərimiz işğal altında qalan Azərbaycan torpaqları uğrunda qəhrəmancasına şəhid olublar. Şəhid olanlar içərisində ömrünün 26 ilini hərbi xidmətə həsr etmiş polkovnik-leytenant Raquf Orucov da var idi.

Aprelin 5-i polkovnik-leytenant Raquf Orucov son mənzilə yola salınıb, Sumqayıt şəhərində baş tutan dəfn mərasiminə minlərlə insan, Müdafiə Nazirliyinin yüksəkrütbəli zabitləri iştirak edib.

Oxu.Az şəhid polkovnik-leytenant Raquf Orucovun timsalında Vətənimizin ərazi bütövlüyü və suverenliyi uğrunda canlarından keçən bütün qəhrəmanlarımızın xatirəsini dərin hörmət və ehtiramla yad edir.