Azərbaycan Respublikası Dövlət Neft Fondunun (SOFAZ) Çin-ASEAN Birgə İnvestisiya Şurasının yaradılmasında iştirakı ölkənin Asiya və Avropa arasında birləşdirici halqa kimi mövqeyini əks etdirir.

AVESTA.AZ "Report"a istinadən xəbər verir ki, bu barədə "Euronews"un məqaləsində qeyd olunub.

SOFAZ bu həftə Syamendə keçirilən Çin Beynəlxalq İnvestisiya və Ticarət Yarmarkasında Çin-ASEAN Birgə İnvestisiya Şurasını yaratmaq üçün beş Asiya suveren və pensiya investoruna qoşulub. Beləliklə, fond 2 milyarddan çox əhalisi olan bazarda fəaliyyət göstərən təşkilatın təsisçiləri arasında yer tutub.

Digər təsisçilərin tərkibinə Çin İnvestisiya Korporasiyası (CIC), Tailandın Dövlət Pensiya Fondu, Malayziyanın "Khazanah Nasional Berhad" və KWAP pensiya fondu, eləcə də "Indonesia Investment Authority" (INA) daxildir. CIC şuranın yaradılması təşəbbüsü ilə çıxış edib, Sinqapurdan olan "CGS International Securities" isə onun katibliyi funksiyalarını yerinə yetirir.

Məqalədə bildirilib ki, 2025-ci ildə Çin və ASEAN arasında ticarət ilk dəfə 1 trilyon dollar həddini aşaraq 1,05 trilyon dollara çatıb, bu da ötən ildəkindən 7,4 % çoxdur. Bununla yanaşı, Cənub-Şərqi Asiya rekord həcmdə – 243,9 milyard dollar birbaşa xarici investisiya cəlb edib, bu da ötən illə müqayisədə 9,7 % çoxdur və bu cür investisiyaların qlobal həcminin 15 %-ni təşkil edir.

"Euronews" qeyd edib ki, SOFAZ-ın bu qrupda iştirakı Azərbaycanın dünya xəritəsindəki mövqeyini əks etdirir. Ölkə Orta Dəhlizdə – Asiya və Avropa arasında yüklərin daşındığı, Xəzər dənizindən keçən dəmir yolu və dəniz marşrutunda yerləşir. 2024-cü ildə Avropa Komissiyası "Global Gateway" proqramı çərçivəsində bu istiqamətin inkişafına 10 milyard avro ayırıb.

Məqalədə həmçinin vurğulanıb ki, nəqliyyat əlaqəliliyi inkişaf etdikcə Azərbaycanın iki region arasında birləşdirici halqa kimi əhəmiyyəti artır.

Məqalədə qeyd olunan SOFAZ-ın məlumatlarına görə, bu marşrutla təkcə yük deyil, həm də kapital daşına bilər. Bu, ona marşrutun Asiya tərəfində investisiya yatıran institutlarla əməkdaşlıq etmək imkanı verir və uzunmüddətli investor üçün tərəfdaşlar dairəsini genişləndirir.

"Euronews" qeyd edib ki, SOFAZ iyulun 1-də yuanla ifadə olunan ilk aktivlərini əldə edərək 2015-ci ildə Çin bazarına daxil olub. 2025-ci ilin aprelində Azərbaycan Prezidenti İlham Əliyevin Çinə dövlət səfəri zamanı fond CIC ilə anlaşma memorandumu imzalayıb.

2026-cı ilin aprelində bu memorandum investisiyalara çevrilib: SOFAZ CIC və INA ilə birlikdə "Galaxy Orientis China-ASEAN" investisiya proqramını yaradıb.

Birbaşa investisiya fondu ilk mərhələdə hədəflənən 1 milyard dolların təxminən 520 milyon dollarını cəlb edib. O, sənaye, səhiyyə, istehlak sektoru, biznes xidmətləri və texnologiyalara sərmayə yatırır. Proqram şuradan ayrı idarə olunur.

Azərbaycanın neft və qaz gəlirlərini idarə edən SOFAZ iyun ayının sonuna 72,6 milyard dollar məbləğində aktivlərə malik idi.

Məqalədə bildirilib ki, şura ixtisaslaşmış institutlara, yerli bazarlar haqqında biliklərə və investisiya meylləri barədə daha erkən məlumatlara çıxışı təmin edir.

Şura fəaliyyətinə öz kapitalı olmadan başlayır: o, fond deyil və oraya üzvlük investisiya yatırmaq üzrə öhdəlik yaratmır - bu barədə qərarları hər bir təşkilat müstəqil şəkildə qəbul edir. İlk mərhələdə forumlar və birgə tədqiqatlar nəzərdə tutulur, investisiyalar isə iştirakçıların maraqlarının üst-üstə düşdüyü sahələrdə həyata keçiriləcək.