Bakıda ilk dəfə keçirilən çimərlik polosu üzrə "Sea Breeze" beynəlxalq turnirinin final matçının favoriti Azərbaycanın "Elit polo club" komandasıdır.

AVESTA.AZ xəbər verir ki, bunu "Report"a açıqlamasında İsveçrənin "Sankt-Moritz" klubunun üzvü Daniel Savari deyib.

İdmançı turnirin təşkilatçılığı ilə də bağlı fikirlərini bölüşüb: "Turnir yüksək səviyyədə təşkil olunub. Burada beynəlxalq klublarla yanaşı, Azərbaycanın da çox güclü kollektivi mübarizə aparır.

Biz bura ilk dəfə gəlmişik. Yarışın qum üzərində keçirilməsi fərqli hissdir, çünki adətən ot örtüyündə oynayırıq. Çox maraqlı turnirdir, indiyədək zövqlü matçlar izlədik. Sabah komandamız finalda Azərbaycanla qarşılaşacaq. Görək necə olur, şansı gətirən tərəf qalib gələcək".

İdmançı "Elit polo club"un səviyyəsini də dəyərləndirib:

"Şübhəsiz ki, Azərbaycan komandası favoritdir. Çünki onların heyətində çox güclü, yüksək səviyyəli oyunçular var. Əgər biz qələbə qazansaq, bunu böyük xoşbəxtlik hesab edəcəyik, lakin hər bir halda sonadək mübarizə aparacağıq".

Qeyd edək ki, Azərbaycan təmsilçisi bu gün yarımfinalda Böyük Britaniyanın "Red Star" komandasını 9:7 hesabı ilə üstələyərək finala vəsiqə qazanıb.

Komanda finalda İsveçrə təmsilçisi "Sankt Mortiz"lə münasibətlərə aydınlıq gətirəcək.