Azərbaycanda müstəqilliyin ilk illərində, xüsusilə Sovet İttifaqı dövründə özbaşına inşa edilən, sənədləşdirilməsi mümkün olmayan evlərin təsnifatlaşdırılaraq qeydiyyata cəlb olunması istiqamətində normativ hüquqi sənədlər hazırlanır.

“Report” xəbər verir ki, bu barədə İqtisadiyyat Nazirliyi yanında Əmlak Məsələləri Dövlət Xidmətinin Daşınmaz Əmlakın Dövlət Kadastrı və Reyestrinin İdarə Heyətinin sədr müavini Elşad Məmmədov jurnalistlərə açıqlamasında deyib.

Onun sözlərinə görə, Azərbaycanda 7 mindən artıq sahibkarın qeyri-yaşayış obyektinin sənədləşdirməsi işlərinə artıq başlanılıb və uğurlu bir təcrübə əldə olunub: “Hazırda yaşayış fonduna tətbiqi istiqamətində işlər aparılır. Prezidentin ötən ilin noyabrın 17-də daşınmaz əmlakın elektron reyestr və kadastr informasiya sisteminin yaradılması ilə bağlı fərmanı olub. Daşınmaz Əmlakın Elektron Reyestr və Kadastr İnformasiya Sistemi daşınmaz əmlakın qeydiyyatı və kadastr sahəsində bütün növ əməliyyatların tam elektronlaşdırılmasını və elektron qaydada həyata keçirilməsini nəzərdə tutur”.

O qeyd edib ki, bundan sonra vətəndaşlar müxtəlif dövlət orqanlarına kağız sənədləri alaraq gəlməyə məcbur olmayacaq, bu qurumlar elektron inteqrasiya nəticəsində biri-birlərindən lazımi sənədləri əldə edəcəklər: “Bu istiqamətdə normativ-hüquqi sənədlərin təkmilləşdirilməsi ilə bağlı fərmanda tapşırıq qoyulub. Hazırda həmin normativ sənədlərin hazırlanması davam etdirilir. Portal yaradıldıqdan sonra bütün növ sənədlərin elektron qeydiyyatına başlanılacaq. Burada önəmli yeniliklərdən biri də xüsusilə çoxmənzilli yaşayış binalarında mənzil əldə edilməsi ilə bağlıdır”.

Bildirib ki, hazırda yaradılacaq modulda çoxmənzilli yaşayış binasının tikintisinə icazə alındığı andan etibarən həmin binanın xüsusi bir imitasiyası portalda qeyd olunacaq: “Hər bir mənzil ancaq elektron portal vasitəsilə alqı-satqı oluna biləcək. Bir şəxsə mənzil satıldıqdan sonra həmin mənzil bloklanacaq və ikinci, üçüncü şəxslərə satılmasına yol verilməyəcək. Eləcə də mənzilin ümumi sahəsinin qanunvericiliyə uyğun olaraq hesablanması, ödənişlərin elektron hökumət portalı vasitəsilə həyata keçirilməsi nəzərdə tutulur”.

E.Məmmədov Mənzil-Tikinti Kooperativlərinin (MTK) bir mənzili bir neçə hissəyə bölüb satmaları məsələsinə də münasibət bildirib. O qeyd edib ki, MTK-lar fiziki olaraq mənzili bölüb, yeni qapı qoyub və ya başqa müxtəlif dəyişikliklər edərək sata bilirdilər. Vətəndaşlar sənədləşməyə gələndə məlum olurdu ki, əslində layihədə belə bölgü nəzərdə tutulmayıb. Alqı-satqı əməliyyatları tam elektronlaşdıqdan sonra layihədə olmayan hissə artıq portalda mövcud olmayacaq. Yəni əgər rəsmi qaydada layihəyə dəyişiklik edilməyibsə, şəhərsalma qaydalarına uyğun olaraq layihə təsdiqlənməyibsə, MTK özü fiziki vəziyyət yaradaraq alqı-satqı edə bilməyəcək. Bunun üçün portalda mənzilin hər bir imitasiyası olacaq. Hər bir otağının, hər bir yaşayış və köməkçi sahənin yerləşmə mövqeyi öz əksini tapacaq, vətəndaş aldığı mənzilin bütün məlumatlarını görə biləcək”.

E.Məmmədov bildirib ki, yeni yaradılan portalda elektron arxiv modulu olacaq: “Hər bir vətəndaş öz şəxsiyyət vəsiqəsinin PİN-kodunu orada yazdığı zaman ona digər dövlət orqanlarının bu günə qədər verdiyi sənədlərin elektron təsdiqlənmiş sürətlərini görəcək: “Məsələn, vətəndaşa hər hansı icra hakimiyyəti tərəfindən bir torpağa aid sərəncam verilibsə, qeydiyyat üçün həmin kağızı fiziki olaraq gətirməyə ehtiyac olmayacaq. Həmin dövlət orqanı ilə elektron interasiya qaydasında vətəndaş sənədi portalda görəcək”.