Yaponiya və ABŞ Şərqi Asiyada təhlükəsizlik məsələlərini müzakirə etmək üçün sentyabrın 20-də Nyu-Yorkda Baş nazir Fumio Kişida və Prezident Cozef Bayden arasında sammit təşkil etməyə çalışırlar.

“AVESTA.AZ” xəbər verir ki, bu barədə Kyodo agentliyi məlumat yayıb.

Qeyd olunub ki, Çinin Tayvana artan təzyiqi, Şimali Koreyanın nüvə sınaqları ilə bağlı hədələri və Rusiyanın Ukraynaya müdaxiləsi müzakirə olunacaq məsələlər arasındadır.

Sammitin BMT Baş Assambleyası çərçivəsində baş tutacağı gözlənilir.

Xatırladaq ki, bir müddət öncə Cənubi Koreya, Yaponiya və ABŞ yenidən nüvə sınağı keçirəcəyi təqdirdə KXDR-ə qarşı daha sərt tədbirlərin görülməsi barədə razılığa gəliblər.

Qeyd edək ki, Şimali Koreyanın Ali Xalq Şurası “Nüvə silahı siyasəti” haqqında qanun layihəsini qəbul edib. Qanunda nüvə silahından istifadəyə göstəriş vermək hüququna yalnız ölkə lideri Kim Çen Inın malik olduğu təsbit edilir. KXDR lideri yeni qanunun KXDR-ə hücum zamanı qarşı tərəfə nüvə zərbəsi endirməyə imkan verdiyini bildirib.