Novruz bayramına sayılı günlər qalıb və bazarlarda quru meyvə və çərəzlərə tələbat artıb. Bu məhsulların qiymətləri çeşidinə və keyfiyyətinə görə dəyişir.

BAKU.WS-in məlumatına görə, hazırda bazarlarda qoz 5-10 manat, fındıq 5-8 manat, iydə 7 manat, innab 9-15 manat, xurma 15 manat, püstə 25-29 manat, qoz ləpəsi 16 manat, fındıq ləpəsi 15-17 manat, badam isə 22-26 manat arasında dəyişir.

Meyvə-tərəvəzlərdə isə qiymətlər belə dəyişir: alma 1.50-2.50 manat, armud 3-5.30 manat, protağal 1.80-3.70 manat, mandarin 2.30-3.80 manat, banan 3-3.50 manat.

Qiymət fərqləri məhsulun mənşəyi, keyfiyyəti və bazarlardakı təklif-tələb balansı ilə bağlıdır. Məsələn, iri və yağlı qozlar daha baha satılır, fındıq ləpəsinin qiyməti isə bölgədən asılı olaraq dəyişir. Eyni zamanda, xaricdən gətirilən püstə və badam yerli məhsullarla müqayisədə daha yüksək qiymətə təklif olunur.

Alıcılar bayram ərəfəsində qiymət artımını nəzərə alaraq alışlarını vaxtında etməyə üstünlük verirlər. Satıcılar isə tələbə uyğun olaraq müxtəlif keyfiyyətdə və qiymətdə məhsullar təqdim edirlər. 

İqtisadçı-ekspert Xalid Kərimli BAKU.WS-ə açıqlamasında bildirdi ki, hazırda qiymətlərdə 4 faiz  atrımlar müşahidə olunur:

"Novruz bayramı ərəfəsində ərzaq qiymətlərində inflyasiya davam edir. Bu, sırf Novruz bayramı ilə əlaqədar deyil. Yanvar-fevral aylarında da bu artım meşadiə edilib.

Xüsusən də meyvə-tərəvəz qiymətlərindəki artımları görürük. Meyvə-tərəvəz qiymətləri artmaqda davam edir. Hər ay ötən aya nisbətdə demək olar ki, 4 faiz artım müşahidə olunur. Bu vəziyyət son iki ayda belə davam edir. 

Eyni zamanda çərəzlərdə də qiymət artımı müşahidə olunur və bu proses sürətlə davam edir. Ümumiyyətlə cari ilin fevral ayında ən yüksək bahalaşma qoz, fındıq və çərəz məhsulları ilə yanaşı, çörək, makaron, kolbasa məmulatları, uşaq qidası, quru süd qarışığı, kərə, günəbaxan, qarğıdalı yağlrı, limon, portağal, narıngi, alma, armud, heyva, kələm, xiyar, pomidor, balqabaq, sarımsaq, soğan və kartofda qeydə alınıb".

Orxan Hüseyn