“Bütün cəbhə boyu Rusiyanın canlı qüvvəsinin və ağır texnikasının irəliləyişinin qarşısı alınıb. Hər gün bir neçə döyüş təyyarəsini itirən işğalçılar səmada da özlərini rahat hiss edə bilmir”.

Bu barədə Modern.az-a Ukrayna Azərbaycanlıları Radasının (UAR) icraçı direktoru Ceyhun Məmmədov məlumat verib.

Onun sözlərinə görə, Rusiya ordusunun ümidləri ancaq raket zərbələri ilə mülki əhalini hədəf almağa qalıb:

"İnşallah, son ümidləri də yaxın zamanda tükənəcək. İrpen tərəfdən Kiyevə gəlmək istəyən, mərkəzə 30 km-lik məsafədə qarşısı kəsilən, artıq taqəti qalmayan düşmən hava hücumu və raket zərbələri ilə uğur əldə eləmək istəyir. Gecə ərzində bir neçə raketləri havada zərərsizləşdirilib".

"Ukrayna Azərbaycanlıları Radasında humanitar yardım kampaniyası davam edir. Kiyev Azərbaycanlıları Konqresinin sədri, UAR idarə heyətinin üzvü Oleq Krapivin bu gün əlavə 20 ton yardımın gətiriləcəyini bildirib. Soydaşlarımız arasında təxliyə olunmaq istəyənlər artıq tamamilə azalıb. Qaynar xəttə günə 10-15 zəng gəlir. Sadəcə düşmən nəzarətində olan Xerson vilayətində təxliyə olunmaq istəyən qruplar var. Onun üçün də humanitar dəhliz razılaşdırılmalıdır. Hazırda orada vəziyyət nisbi sakitlikdir”,- deyə Ceyhun Məmmədov bildirib.