Qurban Bayramı yaxınlaşdıqca insanlar qurbanlıq heyvan seçimi ilə bağlı suallar qarşısında qalır. Qurban ibadətinin qəbul olunması üçün heyvanın sağlam, şəriətə uyğun və qüsursuz olması əsas şərtlərdəndir. 

AVESTA.AZ xəbər verir ki, bəs qurban seçərkən nələrə xüsusi diqqət edilməlidir?

1. Heyvanın yaşı

İslam qaydalarına əsasən:

Qoyun və keçi 1 yaşını tamamlamalıdır (əgər 6 aylıq qoyun bir yaşındakı kimi cüssəlidirsə, qurbanlıq sayılır),

Dabanı və ya buynuzu çıxmış danalar üçün 2 yaş,

Dəvələr üçün isə 5 yaş tamam olmalıdır.

2. Sağlamlıq vəziyyəti

Qurbanlıq heyvanın:

-Kor olmaması,

-Axsamaması,

-Qulağının və buynuzunun tam olması,

-Qarnında, dişlərində və bədənində ciddi bir qüsurun olmaması vacibdir.

Xəstə, zəif və qüsurlu heyvanlar qurbanlıq sayılmır.

3. Bədən quruluşu və baxımı

Qurbanlıq heyvan gümrah, ətli və təmiz saxlanılmalıdır. Arıq, baxımsız və inkişafdan qalmış heyvanlar uyğun deyil. Heyvanın tez-tez öskürməsi və ya qusması da sağlamlıq göstəriciləri baxımından nəzərə alınmalıdır.

4. Baytarlıq sənədi

Heyvanın sağlam olduğunu təsdiqləyən baytarlıq arayışı da tələb olunur. Rəsmi satış məntəqələrindən alınan heyvanlar daha etibarlıdır və zoonoz xəstəliklərin yayılmasının qarşısını alır.

5. Etik və gigiyenik şərait

Heyvanların satıldığı və kəsildiyi yerlərdə gigiyenik şəraitə əməl olunmalı, onların rahat və insani şəkildə saxlanması təmin edilməlidir. Stress altında olan heyvanın əti də keyfiyyətli olmur.

Qurbanlıq heyvan seçərkən həm dini qaydalara, həm də gigiyenik və etik prinsiplərə riayət etmək lazımdır. Bu, həm ibadətin qəbul olunması, həm də cəmiyyətin sağlamlığı baxımından mühüm əhəmiyyət daşıyır. Ən əsası isə – qurban, niyyətlə başlayır.