Gəncə Ağır Cinayətlər Məhkəməsi Şəmkir rayonunda qonşusunu bıçaqlayaraq ağır xəsarət yetirməkdə ittiham olunan 39 yaşlı Amil Məmmədovu (ad və soyad şərtidir) Azərbaycan Respublikası Cinayət Məcəlləsinin 126.1-ci maddəsi (qəsdən sağlamlığa ağır zərər vurma) ilə təqsirli bilib.

Məhkəmə təqsirləndirilən şəxsə 3 il azadlıqdan məhrum etmə cəzası təyin edib, lakin əvvəlki 2 ay həbs müddətini çıxmaqla qalan 2 il 10 ay cəzanı şərti hesab edərək, 1 il 6 ay sınaq müddəti müəyyən edib. Hökm 27 noyabr 2025-ci il tarixində çıxarılıb və hələ qanuni qüvvəyə minməyib.

AVESTA.AZ-in məlumtına görə, hadisə 8 iyul 2025-ci il gecə saatlarında Şəmkir rayonunun Dəllər-Cırdaxan kəndində baş verib.

Təqsirləndirilən şəxs qardaşı Muradın qonşusu Elnur Vəliyev (ad və soyad şərtidir) tərəfindən döyülməsini öyrənib. Qardaşını qan içində görən Amil Məmmədov evdən mətbəx bıçağı götürərək Elnurun evinin qarşısına gedib.

Orada mübahisə yaranıb və təqsirləndirilən şəxs bıçaqla qonşusunun döş qəfəsinə və qarın nahiyyəsinə bir neçə zərbə vurub. Nəticədə Elnur ağır xəsarətlər alıb: qarın divarının deşilmiş-kəsilmiş yarası bağırsaq və pankreası zədələyib, daxili qanaxmaya səbəb olub.

Tibbi ekspertiza bu xəsarəti həyat üçün təhlükəli ağır zərər kimi qiymətləndirib. Bıçaq kustar üsulu ilə hazırlanmış mətbəx aləti kimi tanınıb və soyuq silah hesab edilməyib.

Məhkəmə istintaqında Amil özünü tam təqsirli bilib, əməlini etiraf edib və peşman olduğunu bildirib. O, hadisədən sonra könüllü olaraq polisə təslim olub. Zərərçəkmiş Elnur da ifadəsində barışdıqlarını, şikayətinin olmadığını və dəymiş zərərin ödənildiyini qeyd edib. Şahidlər də hadisəni təsdiqləyib, lakin birbaşa şahid olmadıqlarını bildiriblər. Ekspertiza rəyləri, protokollar və digər sübutlar təqsirləndirilən şəxsin əməlini tam sübut edib.

Məhkəmə cinayətin ictimai təhlükəliliyini, təqsirləndirilən şəxsin peşmançılığını, azyaşlı övladlarının olmasını (üç uşaq), zərərçəkmişlə barışmasını və müsbət xarakteristikanı nəzərə alıb. Cəza yüngülləşdirici hallar əsasında şərti tətbiq edilib. Təqsirləndirilən şəxs sınaq müddətində yaşayış yerini dəyişmək istədikdə polisə məlumat verməli və nəzarət altında olacaq.