"Chapman Taylor" beynəlxalq məsləhətçi şirkətinin İdarə Heyətinin üzvü Marselina Zielinska Qarabağa növbəti səfəri ilə bağlı təəssüratlarını bölüşüb.

BAKU.WS report-a istinadən xəbər verir ki, o, özünün "LinkedIn" sosial şəbəkə hesabında paylaşımında səfər çərçivəsində şirkətin mütəxəssislərinin Dövlət Şəhərsalma və Arxitektura Komitəsinin nümayəndələri ilə birlikdə Şuşada həyata keçirilən layihələrin icra vəziyyəti ilə tanış olduqlarını bildirib. Zielinskanın paylaşımında şəhərdə aparılan bərpa və quruculuq işlərinin nəticələri, eləcə də Baş planda nəzərdə tutulan şəhərsalma həllərinin mərhələli şəkildə həyata keçirilməsi diqqətə çatdırılıb.

Şirkət nümayəndəsi şəhərin ilk yaşayış məhəllələrindən birində formalaşan yeni həyata xüsusi diqqət çəkərək yazıb ki, burada artıq ailələr məskunlaşıb, supermarket, aptek və iki gözəllik salonu da daxil olmaqla ticarət və xidmət obyektləri fəaliyyət göstərir.

"Məhəllənin necə canlandığını görmək düşünülmüş planlaşdırma və dizaynın cəmiyyətə göstərdiyi təsirin sübutudur", – deyə Zielinska bildirib.

Paylaşımda Şuşanın əsas ictimai və ticarət məkanlarından birinə çevrilən Qarabağ küçəsi ilə bağlı məqamlar da əks olunub. Zielinskanın sözlərinə görə, küçə üçün hazırlanmış konsepsiyanın icrası yekunlaşmaq üzrədir. Burada kommersiya obyektlərinin hamısı hələ fəaliyyətə başlamasa da, küçə artıq işıqlı və canlıdır, piyadaların fəal istifadə etdiyi şəhər məkanına çevrilir.

Mütəxəssis yazır ki, küçənin memarlıq tərtibatında yerli təbii daşlardan istifadə edilib, ərazi isə piyadalar və nəqliyyat vasitələri üçün vahid məkan (shared space) prinsipi əsasında təşkil olunub. Bu yanaşma isə daha rahat, təhlükəsiz və insanyönümlü şəhər mühitinin formalaşmasına imkan verir.

Sözügedən layihələr Şuşanın kompleks şəhərsalma inkişafının tərkib hissəsidir. Şəhərin 2040-cı ilədək inkişafına dair Baş planını Dövlət Şəhərsalma və Arxitektura Komitəsinin sifarişi ilə "Chapman Taylor" və Bakı Dövlət Layihə İnstitutu hazırlayıb və 2024-cü ildə Nazirlər Kabinetinin qərarı ilə təsdiq edilib.

Xatırladaq ki, 506 hektar ərazini əhatə edən Baş plan Şuşanın tarixi-memarlıq kimliyinin və unikal təbii landşaftının qorunmasını, eyni zamanda, müasir şəhərsalma həllərinin tətbiqini nəzərdə tutur. Sənədin əsas yanaşmalarından birini sakinlərin gündəlik tələbatlarını yaşayış məhəllələrinin yaxınlığında qarşılamağa imkan verən "15 dəqiqəlik şəhər" konsepsiyası təşkil edir.

Baş planda müasir nəqliyyat həlləri, keyfiyyətli ictimai məkanlar və ekoloji infrastruktur da əsas istiqamətlər kimi müəyyənləşdirilib. Bu yanaşmaların nəticələri artıq şəhər mühitində özünü göstərir. Tam elektrikləşdirilmiş ictimai nəqliyyat, yeraltı tullantı toplama və çeşidləmə sistemi buna nümunədir.

Britaniyalı ekspertin paylaşımı əslində Baş planda nəzərdə tutulan şəhərsalma həllərinin artıq real şəhər mühitində öz əksini tapdığını, Şuşanın tarixi siması və memarlıq kimliyi qorunmaqla müasir, rahat və dayanıqlı şəhər kimi inkişaf etdiyini, onun bərpaolunan məhəllələrinə həyatın yenidən qayıtdığını göstərir.

Qalereya