İranda altı aydır davam edən müharibə şəraiti əhalinin, onsuz da, ağır olan iqtisadi vəziyyətinin daha da pisləşməsinə səbəb olub və ölkədə sosial partlayış ehtimalını artırıb.

AVESTA.AZ xəbər verir ki, bu barədə "Azad İran" "YouTube" kanalında yayımlanan videomaterialda qeyd olunub.

Süjetdə bildirilir ki, zəruri istehlak mallarının qiymətinin durmadan artması, milli valyutanın sürətlə dəyərdən düşməsi, işsizliyin miqyasının günbəgün genişlənməsi kimi amillər getdikcə artan xarici təzyiqlər fonunda vətəndaşların yaşayışını son dərəcə çətinləşdirib və İran hakimiyyətini yeni kütləvi etirazlar təhlükəsi ilə üz-üzə qoyub.

İran rəsmilərinin son günlər verdiyi bir sıra açıqlamalar ABŞ-nin iqtisadi təcrid strategiyası və dəniz blokadasının ölkədə sosial-iqtisadi durumu daha da çətinləşdirəcəyi və son nəticədə küçə etirazlarının alovlanmasına təkan verəcəyi ilə bağlı rejimin ciddi narahatlıq keçirdiyini nümayiş etdirir.

Həmçinin vurğulanır ki, İran məhkəmə hakimiyyətinin rəhbəri Qulamhüseyn Mohseni-Ejeinin səsləndirdiyi fikirlər də bunun təzahürü kimi qiymətləndirilə bilər. Ali Məhkəmə Şurasının iclasında çıxış edən Ejei ölkədə yeni kütləvi etirazlar ehtimalından danışıb və təhdid dilindən istifadə edərək deyib:

"Əgər ölkə daxilində yenidən qarışıqlıq törətməyə çalışsalar, bizim cavabımız əvvəlki dövrlərdən daha qətiyyətli olacaq".

Əvvəlki dövr dedikdə, Ejeinin bu ilin yanvarında minlərlə vətəndaşın ölümü ilə nəticələnmiş etiraz aksiyalarına işarə etdiyi aydındır. Bununla da etirazlar yenidən başlayarsa, rejimin daha çox insanı qırmağa hazır olduğu bəlli olur.

Qeyd olunur ki, Ejeinin sonrakı sözləri də bunu göstərir.

"Düşmən öz əlaltıları vasitəsilə daxildə təhlükəsizliyi pozmaq və iğtişaş törətmək fikrindədir. Belə bir hal baş verərsə düşmənə və onun əlaltılarına sərt bir cavab verəcəyik", - deyə o bildirib.