Braziliya məhkəməsi Teleqram messencerinin ölkədə bloklanmasına dair qərar qəbul edib.

"AVESTA.AZ" bu barədə G1 nəşrinə istinadən xəbər verir.

Qeyd olunub ki, platforma yerli polisə inzibatçılar və yerli neonasist qruplar və kanalların üzvləri haqqında tam məlumat verməyib. Belə ki, teleqram həqiqətən də bəzi məlumatları paylaşıb, lakin onlar, məsələn, istintaqı maraqlandıran telefon nömrələrini daxil etməyiblər.

Bununla əlaqədar olaraq, məhkəmə provayderlərə və tətbiq mağazalarına teleqrama girişi dərhal məhdudlaşdırmağı əmr edib. Braziliya Federal Polisinin Kəşfiyyat İdarəsi bildirib ki, əsas telekommunikasiya operatorları, həmçinin Google və Apple korporasiyaları tezliklə bu tələblə məktublar alacaqlar.

Məhkəmə messencerin işini dayandırmaqla yanaşı, ədalətin tələblərinə əməl etmədiyi üçün şirkətə tətbiq edilən cəriməni də artırıb. İndi teleqram gündə 100 000 Braziliya realı (20 000 dollar) əvəzinə bir milyon (200 000 dollar) real ödəyəcək.

Məhkəmə sisteminin teleqrama qarşı iddialarına səbəb 2022-ci ilin noyabrında Arakruz şəhərində (Espiritu-Santu ştatı) 16 yaşlı şagirdin iki məktəbə silahlı hücumu olub. Nəticədə 4 nəfər həlak olub, daha 11 nəfər yaralanıb. İstintaq zamanı məlum olub ki, hücum edən şəxs bir neçə antisemit teleqram kanalının üzvü olub.