“Orta Dəhliz Türk Dövlətləri Təşkilatına (TDT) üzv ölkələr üçün sabit və təhlükəsiz ticarət marşrutudur”.

Bunu “Report”a açıqlamasında türkiyəli iqtisadçı Engin Özer Türk İnvestisiya Fondunun yaradılmasına və onun Orta Dəhlizin inkişafındakı roluna münasibət bildirərkən deyib.

Onun sözlərinə görə, Orta Dəhlizin inkişafı sərmayə axınının sürətləndirilməsinə, türk dünyası ölkələri arasında əməkdaşlığın gücləndirilməsinə kömək edəcək və Azərbaycan bu məsələdə mühüm rol oynayır: “Türk İnvestisiya Fondunun təsis edilməsinin üstünlükləri ondan ibarətdir ki, onun yaradılması təşəbbüsü ilə çıxış edən ölkələr eyni regiondadır və onların bir-biri ilə heç bir problemi yoxdur. Fond infrastruktur layihələrinin, xüsusən də Bakı Beynəlxalq Dəniz Ticarət Limanı ilə bağlı layihələrin icrasının sürətləndirilməsinə və təşviqinə dəstək verə bilər”.

Ekspert bu fondun səmərəli fəaliyyətinə mənfi təsir göstərə biləcək açıq-aşkar problem və yaxud təhlükənin olmadığını vurğulayıb.

O qeyd edib ki, Türk İnvestisiya Fondunun hansı sahələrə daha çox diqqət yetirəcəyi ilə bağlı dəqiq təsəvvür olmasa da, Zəngəzur dəhlizi və onun inkişafı bu fondun diqqət mərkəzində ola bilər: “Çünki Mərkəzi Asiya ölkələrinin məhsulları bu dəhliz vasitəsilə Avropa İttifaqı bazarlarına daha tez çatdırılacaq”.

E.Özer əlavə edib ki, Türk İnvestisiya Fondu regiondaxili ticarətin, kiçik və orta sahibkarlığın, təchizat zəncirinin, kənd təsərrüfatının, “yaşıl enerji”nin və turizmin inkişafına kömək edəcək.