Transxəzər Beynəlxalq Nəqliyyat Dəhlizinin (Orta Dəhliz) rəqəmsallaşma konsepsiyası hazırlanır.

Bunu “AVESTA.AZ”a açıqlamasında "Transxəzər Beynəlxalq Nəqliyyat Marşrutu Assosiasiyası"nın baş katibi Qaydar Abdikerimov bildirib.

"Orta Dəhlizin rəqəmsallaşması çox vacib və qaçılmaz məsələdir. Bunu tətbiq etməsək, digər dəhlizlər qarşısında rəqabətqabiliyyətliliyimizi itirə bilərik. Ona görə də bir sıra istiqamətlər üzrə iş aparırıq. Rəqəmsallaşma ilə bağlı beynəlxalq şirkətlərlə danışıqlar gedir", - deyə o qeyd edib.

Q.Abdikerimovun sözlərinə görə, Orta Dəhlizdə konteyner daşımaları üçün platformalar yaradılır: “Platformalar imkan verəcək ki, dəhliz boyunca rəqəmsallaşma həyata keçirək. Növbəti il üçün əsas hədəfimiz rəqəmsal platformalarıı dəhlizdə istifadə etmək, bununla da ekosistem yaratmaqdır. Bu platforma yükdaşıyanlar üçün xidmətdir”.

“Orta Dəhlizə üzv ölkələrin müxtəlif platformalarını inteqrasiya etmək lazımdır. Məsələn Azərbaycanın Gürcüstanla, Gürcüstanın Qazaxıstanla inteqrasiyası çox vacibdir. Bütün ölkələrin bir formatı olmalıdır. Bu, məlumatların rahat formada, məhdudiyyətsiz ötürülməsi üçün önəmlidir”, - deyə Q.Abdikerimov əlavə edib.

O, “Azərbaycan Dəmir Yolları” QSC, “Qazaxıstan Dəmir Yolu” SC və “Gürcüstan Dəmir Yolu” SC-nin paritet əsasda birgə müəssisə yaradılması ilə bağlı müqavilə imzalamasını irəliyə doğru atılmış addım hesab etdiyini deyib: "Bu dəhlizdə işlərin sürətlənməsinə xidmət edəcək, biz tezlikdə bu fəaliyyətin müsbət nəticəsini görəcəyik. Bu yükdaşıyanlar üçün yeni imkanlar yaradacaq. Orta Dəhliz inkişaf edir, şaxələnir. Dəhlizə üzv olan ölkələr infrastrukturlarını inkişaf etdirilər. Dəhlizin inkişafı ilə bağlı siyasi iradə var. Biz onu görürük. Bu isə bizim üçün çox vacibdir”.

Xatırladaq ki, Orta Dəhliz 2014-cü ilin fevral ayında Azərbaycan, Qazaxıstan və Gürcüstanın müvafiq strukturlarının iştirakı ilə yaradılıb. Sonradan layihəyə Ukrayna, Rumıniya və Polşa qoşulub. Hazırda marşrut Çin-Qazaxıstan sərhədindən başlayır və Qazaxıstan, Xəzər dənizi, Azərbaycan və Gürcüstan ərazisindən keçərək Avropaya qədər uzanır. Bütün marşrut boyunca vahid tarif yaradılıb, “vahid pəncərə” prinsipi tətbiq olunur.