“Bu gün muğam sənətinə və sənətkarlarımıza verilən qiymət göz qabağındadır. Bilirsiniz ki, 2005-ci ildən müsabiqələr başlayıb, istedadlı gənclərimizin üzə çıxmasında Mehriban xanım Əliyevanın rəhbərliyi altında Heydər Əliyev Fondunun böyük xidmətləri var. Muğam ensiklopediyasının hazırlanması, muğam ustadlarımızın disklərinin yazılması, rayonlarımızda Muğam Evlərinin açılışları Heydər Əliyev Fondunun layihələridir”. 

Bunu açıqlamasında Xalq artisti Nəzakət Teymurova Mehriban xanım Əliyevanın Birinci vitse-prezident kimi fəaliyyətinin beş ili haqda danışarkən deyib. Muğam ifaçısı dövlətimiz tərəfindən muğan sənətinə göstərilən diqqətin gənclərdə bu sənətə maraq oyatdığını bildirib:

“Muğam sənətinə göstərilən diqqət və qayğı gənclərimizdə də bu sənətə maraq oyadıb. Bizim vaxtımızda bir müsabiqə olanda inanın ki, illərlə gözləyirdik. Deyirdik ki, görən nə vaxt biz sənətimizi göstərmək üçün belə bir şərait yaradılacaq. Ona görə də Mehriban xanım Əliyevanın istər muğam sənətinə, istərsə də sənətkarlarımıza çox böyük diqqət və qayğısı həm ölkəmizdə, həm də ölkədən kənarda çox yüksək qiymətləndirilib. Sənət adamlarının ayrı-ayrılıqda öz qiymətini verir, hər kəsin qayğısına qalır. Düşünürəm ki, bundan böyük dəstək ola bilməz. Heç vaxt dövlət tərəfindən sənətimizə belə qayğı olmamışdı. Ona görə Mehriban xanıma bir daha öz təşəkkürümüzü bildiririk, ona işlərində uğurlar arzulayırıq”.