Prezident Donald Trampın ABŞ-nin Beynəlxalq İnkişaf Agentliyinin (USAID) fəaliyyətini dayandırması gözlənilən idi. Çünki D.Trampın prezidentliyinin birinci dövründə bu təşkilatla bağlı mövqeyi nikbin deyildi.

Bu sözləri "Report"a açıqlamasında Milli Məclisin deputatı Könül Nurullayeva deyib.

"Tramp həmişə təşkilatın xərclərinin ABŞ-nin maraqlarına cavab vermədiyi qənaətində olub. Bu dəfə isə artıq açıq və sərt şəkildə "radikal dəlilər tərəfindən idarə olunan" USAID-in cinayətkar təşkilat olduğu təsdiqini tapır. Tramp USAID-i ölkə büdcəsindən əsassız olaraq böyük məbləğdə pul “yeyən” struktur hesab edir".

Deputat qeyd edib ki, hazırda USAID-in əsl mahiyyəti çox dəqiqliklə ifşa olunur:

"Agentliyin düzgün icra olunmayan və ya gözlənilən nəticəni verməyən müqavilələrinin ləğvindən əldə edilən qənaət 110 milyon dollara çatıb. Bağlanan proqramlar arasında mediaya, jurnalistlərə və qeyri-kommersiya təşkilatlarına maliyyə dəstəyi də daxildir. Demokratlar Partiyası haqqında bir neçə müsbət məqaləyə görə “Politico”ya 8 milyon dolların ödənməsi vergi ödəyiciləri hesabına edilən və ABŞ-nin yeni hakimiyyəti tərəfindən qəzəblə qarşılanan investisiyanın tərkib hissəsidir. Geniş mənada söhbət siyasi proseslərə, o cümlədən müxtəlif səviyyələrdə seçkilərə, vətəndaş cəmiyyəti institutlarına qrantların paylanması yolu ilə təsir etmək cəhdlərindən gedir".

K.Nurullayeva COP29 dövründə beynəlxalq mediada Azərbaycana qarşı aparılan çirkin kampaniyaların da arxasında USAID-in dayandığını deyib:

"Araşdırmalar göstərir ki, USAID 707 media, 6 min 200 jurnalist və 279 jurnalistika sahəsində çalışan QHT-ni maliyyələşdirib. Bu maliyyələşmənin müstəqil siyasət yeridən dövlətlərə qarşı qarayaxma kampaniyalarına yönəldiyinə artıq şübhə yeri qalmır. Azərbaycanda 2012-ci ildə “Eurovision” mahnı müsabiqəsi, 2015-ci ildə keçirilən ilk Avropa oyunları da daxil olmaqla, həmçinin 44 günlük Vətən müharibəsində, Laçın yolunda ekoloqların aksiyaları, COP29 dövründə beynəlxalq mediada ölkəmizə qarşı aparılan çirkin kampaniyanın da arxasında elə USAID dayanıb".

Deputat sözügedən qurumun fəaliyyətinin dayandırılmasının iğtişaşlar yaratmaq, sabitliyi pozmaq cəhdlərinin qarşısının alınması kimi qiymətləndirib:

"USAID fəaliyyəti dövründə heç vaxt ikitərəfli humanitar əməkdaşlığın inkişafının təşviqi ilə bağlı bəyan edilmiş məqsədlərə cavab verməyib. Təşkilat, ölkələr daxilində xaos yaradan media orqanları və QHT-lərin əsas sponsoru olub. Bu cinayətkar təşkilat Əfqanıstanda narkotik istehsalına, eyni zamanda “Əl-Qaidə” təşkilatına dəstək verməkdə də ittiham olunur. Bu qurumun fəaliyyətinin dayandırılması iğtişaşlar yaratmaq, sabitliyi pozmaq cəhdlərinin qarşısının alınması deməkdir".