Fransanın paytaxtı Parisdə əlcəzairlilər bu ölkənin kolonial siyasətinə qarşı etiraz aksiyası keçiriblər.

"AVESTA.AZ"un Fransa bürosu xəbər verir ki, aksiya iştirakçıları Fransa hökumətini Əlcəzairdə törətdiyi cinayətləri tanımağa çağırıblar.

Etirazçılar müstəqillik uğrunda canını fəda etmiş əlcəzairli şəhidlərin kəllələrini eksponat kimi Parisdə muzeydə nümayiş etdirməyin insanlığa sığmayan bir rəzalət olduğunu bildiriblər.

Qeyd edilib ki, başları kəsilmiş əlcəzairli əsgərlərin kəllələri Əlcəzairə qaytarılmalıdır.

Aksiya zamanı Fransanın Əlcəzairdə apardığı nüvə sınaqları nəticəsində minlərlə insanın həlak olduğu, yerli əhalinin zorla deportasiyaya məruz qaldığına toxunulub.

Həmçinin, Fransanın Əlcəzairi talan etdiyi, həm maddi, həm də mənəvi sərvətlərini mənimsədiyi bildirilib.

Aksiyada Fransa dövlətindən törətdiyi müharibə cinayətlərini rəsmi şəkildə tanıması tələb olunub.