Dünya Bankı (DB) "Xəzər-Qara dəniz-Avropa Yaşıl Enerji Dəhlizi" təşəbbüsünü dəstəkləməyə hazır olduğunu təsdiqləyir.

BAKU.WS report-a istinadən xəbər verir ki, bunu Bankın Cənubi Qafqaz üzrə regional direktoru Roland Prays Bakıda keçirilən Cənub Qaz Dəhlizi (SGC) Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında bildirib.

Onun sözlərinə görə, Dünya Bankı artıq özəl sektor vasitəsilə layihəyə dəstək göstərir.

"Bank "yaşıl enerji dəhlizi"nin inkişafına yönəlmiş investisiyalara başlayıb. 2025-ci ilin martında AZURE layihəsi təsdiqlənib ki, bunun məqsədi 1,8 QVt bərpa olunan enerji mənbələrinin milli enerji sisteminə etibarlı inteqrasiyasını təmin etməkdir", - R.Prays qeyd edib.

O əlavə edib ki, Dünya Bankı həmçinin Mərkəzi Asiyanın əhəmiyyətli hidroenerji potensialından istifadə də daxil olmaqla, enerji istehsalı layihələrinə investisiya yatırıb: "Ötən ilin may ayında Qara dəniz sualtı kabel layihəsinin həyata keçirilməsində tərəfdaş kimi Gürcüstan hökumətinə dəstək proqramının birinci mərhələsi təsdiq edilib. Bu, "yaşıl enerji" istehsalını Avropa bazarı ilə birləşdirən transavropa elektrikötürücü xətlər şəbəkəsinin əsas elementidir".

R.Prays qeyd edib ki, "yaşıl enerji dəhlizi" layihəsinin həyata keçirilməsi kompleks və əlaqələndirilmiş yanaşma tələb edir: "Buraya dövlət və özəl qurumların iştirakı, ticarət, texniki-iqtisadi, ekoloji və sosial tədqiqatların aparılması, iştirakçı ölkələrdə ötürücü infrastruktura müvafiq investisiyalar və s. daxildir. Beynəlxalq Maliyyə Korporasiyası (IFC) və Çoxtərəfli İnvestisiya Zəmanəti Agentliyi (MIGA) daxil olmaqla Dünya Bank zəruri təcrübəyə malikdir. Bank müxtəlif regionlarda transformasiya infrastruktur təşəbbüslərinin uğurlu həyata keçirilməsinə əsaslanaraq bu layihəni dəstəkləməyə hazır olduğunu təsdiqləyir. Biz əməkdaşlığın daha da dərinləşməsinə ümid edirik".