"Binamızın həyətində uşaqlar üçün park inşa etdirilməsi nəzərdə tutulan ərazidə qazilər qanunsuz olaraq avtoyuma məntəqəsi tikir". 

AVESTA.AZ xəbər verir ki, bu iddia ilə "Qafqazinfo"ya Yeni Günəşli 5-ci massiv, bina 21-in sakinləri müraciət edib. 

Şikayətçilər bildirib ki, bununla bağlı sakinlərə heç bir xəbərdarlıq edilməyib: "Qazilər qrup halında mayın 9-u gecə saatlarında obyekti parka yerləşdiriblər, heç bir icazə sənədləri də yoxdur. Binamızın hər tərəfində park salınıb, bu ərazidə də salınması ilə bağlı qərar verilmişdi. Orada ağac əkməyə belə icazə verilmirdi. Necə oldu ki, bu adamlar belə addım atır?!"

Sakinlər bununla bağlı müvafiq qurumlara da şikayətlər ediblər: "Obyekti qeyri-iş günündə qoyduqları üçün aidiyyəti qurumlardan cavab ala bilməmişik, hələ də oradadır, qaldırılmayıb. Bütün sakinlər bundan narazıdır. 55 nəfər vətəndaş məsələ ilə bağlı polisə şikayət ərizəsi də yazıb".

Məsələ ilə bağlı Suraxanı Rayon İcra Hakimiyyətinə sorğu ünvanladıq. Qurumdan müraciətimizə verilən cavab isə belə oldu: "Vətən müharibəsi qazisi Hüseyn Fərəcov ona məxsus olduğunu iddia etdiyi sözügedən ərazidə yüngül konstruksiyalı qaraj qoyub, RİH tərəfindən vətəndaşa qarajın götürülməsi tövsiyə edilib".