Yay aylarında sərinləmək üçün kondisionerdən geniş istifadə edilsə də, bu cihazın düzgün istifadəsi sağlamlıq baxımından son dərəcə vacibdir.

AVESTA.AZ xəbər verir ki,uzun müddət kondisioner altında qalmaq, xüsusilə də birbaşa hava axınına məruz qalmaq bir sıra sağlamlıq problemlərinə səbəb ola bilər.

Mütəxəssislərin fikrincə, kondisioner altında fasiləsiz şəkildə 1–2 saatdan artıq oturmaq orqanizmdə soyuma, əzələ tutulması, boğaz və oynaq ağrıları, hətta bəzi hallarda pnevmoniya (ağciyər iltihabı) riskini artıra bilər. Bu xüsusilə uşaqlar, yaşlılar və xroniki xəstəliyi olanlar üçün təhlükəlidir.

Kondisioner istifadəsində diqqət edilməli əsas məqamlar bunlardır:

Otaq temperaturu 23–25°C arasında saxlanılmalıdır.

Kondisionerin hava axını birbaşa insanın üzərinə yönəlməməlidir.

Hər 1–2 saatdan bir otaq havalandırılmalı, təmiz hava buraxılmalıdır.

Kondisionerin filtrləri mütəmadi olaraq təmizlənməlidir.

Həmçinin qeyd olunur ki, kondisionerli mühitdən birdən-birə isti havaya çıxmaq da orqanizm üçün zərərlidir. Temperatur fərqi bədəndə şok təsiri yaradaraq, başgicəllənmə, təzyiq düşməsi və digər narahatlıqlara səbəb ola bilər.

Uzmanlar kondisionerdən istifadə zamanı orta yolu saxlamağı, həm rahatlığı, həm də sağlamlığı qorumağı tövsiyə edirlər.