Biləsuvar rayonunun Amankənd kəndi şəhərin mərkəzinə yaxın olan yaşayış məntəqələrindən biridir. Burada yaşayan əhalinin bəziləri rayon mərkəzində işlədiyi üçün gün ərzində şəhərə gedib-gəlməli olurlar. Amma kəndin yollarının bərbad vəziyyətdə olması sakinlərin gediş-gəlişini əməlli-başlı çətinləşdirir.

Bu barədə "Report"un yerli bürosuna bir qrup kənd sakini məlumat verib.

Onların sözlərinə görə, kəndin yolları uzun illərdir bu vəziyyətdədir. Sakinlər deyir ki, bu yollarda qış gələndə palçıq əlindən, yayda isə toz-torpaq əlindən hərəkət etmək olmur. Buna görə də onlar yoldan nə avtomobillərin, nə də piyadaların rahat istifadə edə bildiklərini söyləyirlər:

"Bu yollar minlərlə sakinə xidmət göstərir, amma bu xidmətdən nə biz, nə də sürücülər rahat istifadə edə bilirik. Övladlarımız isə məktəbə gedib gələndə əziyyət çəkirlər. Xüsusən, qış aylarında palçıq nəticəsində hərəkət çətinləşdiyindən heç məktəbə gedə də bilmirlər. Yağış yağanda isə gərək bu yolda uzunboğaz çəkmə ilə hərəkət edəsən. Bundan əlavə, xəstə olanda kəndə nə təcili tibbi yardım çağırmaq olur, nə də rahat şəkildə xəstəxanaya aparmaq olur".

Sakinlər kənd əhalisinin əksəriyyətinin əkinçilik və maldarlıqla məşğul olduğunu vurğulayıb. Amma onlar yol infrastrukturunun bərbad vəziyyətdə olduğuna görə kənd təsərrüfatı məhsullarını rayon mərkəzinə aparıb bazara və yarmarkalara çıxarmaqda çətinlik çəkdiklərini bildiriblər.

Problemlə bağlı yerli icra hakimiyyətindən "Report"un yerli bürosuna bildirilib ki, Amankənd kəndinin yolunun durumundan xəbərdardırlar və bu yolun tezliklə qumlanacağı nəzərdə tutulub: "Bəli bu yolda ciddi problem var. Dəfələrlə kənd bələdiyyəsinə müraciət edilib. Kənd sakinləri bələdiyyəyə olan vergiləri ödəmədiyi üçün 70 min manat borc yaranıb. Bu səbəbdən də kənd bələdiyyəsi bu işləri görə bilmir. Yaxın günlərdə yolun xüsusilə problemli hissələrində icra hakimiyyətinin dəstəyi ilə qumlama işləri aparılacaq. Asfalt işləri isə gələcəkdə həyata keçiriləcək".