Həkimlərin və qidalanma mütəxəssislərinin fikrincə, bəzi ərzaqlar birlikdə istifadə olunduqda orqanizm üçün daha çox fayda verir. Bu zaman qidaların tərkibindəki vitamin və minerallar bir-birinin təsirini gücləndirərək daha yaxşı mənimsənilir.

AVESTA.AZ xəbər verir ki, məsələn, dəmirlə zəngin qidaların (yaşıl yarpaqlı tərəvəzlər, paxlalılar) C vitamini mənbələri ilə (sitrus meyvələri, pomidor) birlikdə qəbulu dəmirin orqanizm tərəfindən daha yaxşı mənimsənilməsinə şərait yaradır.

Balıqla zeytun yağının birlikdə yeyilməsi ürək-damar sağlamlığı üçün faydalı hesab olunur. Eyni zamanda, qatıqla qoz-fındıq kimi qidaların birləşməsi bağırsaq mikroflorasını gücləndirir, immun sisteminə müsbət təsir göstərir.

Mütəxəssislər bildirirlər ki, pomidor və zeytun yağının birlikdə istifadəsi də orqanizmə daha çox fayda verir. Çünki pomidorun tərkibindəki likopen maddəsi yağla birgə qəbul edildikdə daha yaxşı sorulur.

Qidalanma üzrə ekspertlər tövsiyə edirlər ki, gündəlik rasionda müxtəlif ərzaqların uyğun şəkildə birləşdirilməsinə diqqət yetirilsin. Bu, həm sağlamlığın qorunmasına, həm də enerji balansının saxlanılmasına kömək edir.