"Gələn ay 23 yaşı tamam olacaq Dövlət Neft Fondunun (ARDNF) fəaliyyətində Suveren Fondların Beynəlxalq Forumu (SFBF) kimi qlobal təsisatın instusional idarəetmə və hesabatlılıq standartlarının öz əksini tapması Fondun ölkənin investisiya siyasətində və makroiqtisadi sabitliyin təmin olunmasında rolunun möhkəmləndirilməsinə zəmin yaradır".

"Report" xəbər verir ki, bunu ARDNF-in icraçı direktoru İsrafil Məmmədov rəhbərlik etdiyi qurumun təşklatçılığı ilə ötən gün Bakıda işə başlamış və noyabrın 17-nə qədər davam edəcək, “Dəyişiklik naminə sərvətin səfərbər edilməsi” (”Mobilising Capital for Change”) şüarı ilə keçirilən SFBF-nin 14-cü illik iclasında bildirib.

“Bu forum Azərbaycanın 2030-cu ilə baxış və 2022-2026-cı illəri əhatə edən sosial-iqtisadi strategiyası kontekstində ölkənin yaxın müddətli inkişaf potensialının və inkişaf istiqamətlərinin iri instusional investorlara əyani nümayişi üçün uğurlu platformadır”, - deyə o, qeyd edib.

Xatırladaq ki, SFBF Suveren Fondların Beynəlxalq İşçi Qrupunun 5-6 aprel 2009-cu il tarixində Küveytin paytaxtı Əl-Küveytdə keçirilmiş iclasında yaradılıb və ilk rəsmi yığıncağını həmin il oktyabrın 8-9-da Bakıda keçirib. SFBF könüllü qrup olub, əsas məqsədi Suveren Fondların ümumi maraqlarına dair məsələlər ətrafında fikir mübadiləsi aparmaq, Santyaqo prinsipləri və Suveren Fondların fəaliyyətinin anlaşılmasını asanlaşdırmaqdır.

Vahid fəaliyyət standartlarının müəyyən edilməsi və təşviqi məqsədilə yaradılmış, 6 trilyon ABŞ dollarından artıq vəsaiti idarə edən, 32 ölkəni təmsil edən, 37 tam üzv və 9 üzv olmayan tərəfdaş suveren fondları birləşdirən SFBF–nin təsis olunmasında ARDNF ilkin təşəbbüskar kimi çıxış edib və Forumun ilk üzvlərindən biri olub.

ARDNF-nin ev sahibliyi ilə təşkil olunan illik iclas zamanı SFBF-nin İdarə heyətinin, üzv Fondların və Azərbaycanın dövlət nümayəndələrinin iştirakı ilə müxtəlif mövzularda panel müzakirələri və işgüzar görüşlər təşkil olunacaq.

Bakıda keçirilən tədbir ARDNF üçün dünyanın qabaqcıl fondları və maliyyə təşkilatları ilə risklərin idarə edilməsi üzrə təcrübə mübadiləsi və potensial investisiya imkanlarına dair fikir mübadiləsi baxımından yüksək əhəmiyyət daşıyır.