Uzun müddətdir ki, sosial şəbəkələrdə uşaqların davranışları müzakirə obyektina çevrilib.

Uşaqların internet subyektlərinə inteqrasiyası real həyatla əlaqələrin nə dərəcədə inkişaf etməsinə təsiri mövzunun müqayisə predmetinə çevrilib.

Bir çoxu internet oyunlarının və sosial şəbəkələrin uşaqlara mənfi təsir etdiyini deyirsə, bir qrup insan isə onların müasir dövrə adaptasiyasını əsas gətirərək inkişafın qaçılmaz hissəsi kimi görür.

Bəs mütəxəssislər nə düşünür?

Respublika Pediatriya Mərkəzinin Uşaq Bərpa Mərkəzinin psixoloqu Nigar Əhmədova AVESTA.AZ-ə mövzu ilə bağlı açıqlamasında bildirdi ki, sosial şəbəkələrin təsiri də ikitərəflidir.

Mütəxəssisin sözlərinə görə, internetin uşaqlara həm müsbət, həm də mənfi təsirləri var:

"Bir tərəfdən uşaqlar daha çox ünsiyyət və informasiya imkanı əldə edir, digər tərəfdən isə neqativ nümunələr, zorakılıq və müqayisə hissi uşaqların özünü dəyərsiz görməsinə gətirir. Əgər nəzarətsiz buraxılsa, sosial media uşağın psixoloji sabitliyini poza bilər", - deyə Nigar Əhmədova bildirib.

Nervpotoloq, həkim Vüsalə Nuriyeva isə AVESTA.AZ-ə açıqlamasında bildirib ki, sosial şəbəkələrin uşaqlara mənfi təsirləri daha çoxdur.

Onun sözlərinə görə, uşaqların artıq çox erkən yaşda telefon, planşet və internetdən istifadəsi diqqət dağınıqlığına səbəb olur.

"Sosial mediada aqressiv, zorakı və sürətli dəyişən görüntülər uşağın beynini həddindən artıq stimullaşdırır, sakit fəaliyyətlərə adaptasiyanı çətinləşdirir.

Uzun müddət ekran qarşısında qalmaq həm yuxu pozuntusu, həm də hiperaktivlik yaradır", - deyə həkim vurğulayıb.

Vüsalə Nuriyeva valideynlərə xüsusi olaraq bunları tövsiyyə edir:

"Telefon və planşet istifadəsini məhdudlaşdırın, aktiv oyunları artırın.

Uşağın dost seçiminə diqqət edin, aqressiv mühitdən uzaq saxlayın".

Həkim son olaraq onu vurğulayıb ki, valideynlər sosial şəbəkələrdən uşaqlar üçün ancaq maarifləndirmə məqsədilə istifadə edə bilərlər:

"Sosial şəbəkələrdə, internet resurslarında maraqlı kampaniyalar, elm və təhsil yönümlü matreallarla tanış olmaq üçün istifadə oluna bilər. Bu zaman da, uşaqlar valideynlərin nəzarəti altında internetdən istifadə edə bilərlər".

Ziya SƏCCAD