Son illərdə sosial media insanların həyatında əvəzolunmaz rol oynayır. Bəziləri üçün bu platformalar dostlarla əlaqə saxlamaq və xəbərləri izləmək üçün vasitədir, bəziləri üçün isə yalnızlıq hissini gücləndirə bilər.

AVESTA.AZ xəbər verir ki, psixoloqlara görə, sosial media istifadəsi zamanı insanlar passiv skrol etdikdə, yəni sadəcə paylaşımlara baxıb başqaları ilə müqayisə etdikdə yalnızlıq hissi artmağa başlayır. Aktiv istifadə (post paylaşmaq, ünsiyyət qurmaq) isə bəzən bu təsiri azaldır, amma real ünsiyyətin yerini tam əvəz edə bilmir.

Araşdırmalar göstərir ki, sosial media bəzi yaş qruplarında yalnızlığı artırır. Xüsusilə gənclər və tez-tez passiv istifadə edənlər arasında bu hallar daha çox müşahidə olunur. Digər tərəfdən, uzaq ərazilərdə yaşayan və ya yaşlı insanlar üçün sosial media mövcud sosial əlaqələri saxlamaq üçün faydalıdır.

Ekspertlər tövsiyə edir ki, sosial mediadan istifadə zamanı balans qorunmalıdır. Gündəlik istifadə məhdudlaşdırılmalı və real, üz-üzə ünsiyyət unudulmamalıdır. Bu, yalnızlıq və psixoloji narahatlığın qarşısını almağa kömək edir.