"Bəzi insanlar qarşısındakına çox tez güvənir. Bir insanı yeni tanıyır, amma ona sanki illərlə birlikdə olubmuş kimi güvənir. Bu, xüsusilə emosional və empatik insanlarda daha çox görünür".

Bu barədə psixoloq Əbdül Səlimli AVESTA.AZ-ə açıqlamasında bildirib. Onun sözlərinə görə, səmimi və yaxşı niyyətli insanlar çox vaxt qarşıdakının da eyni niyyətlə davrandığını zənn edirlər.

"Təəsüf ki bəzi insanlar özünü sübut etmə ehtiyacı hiss edir "məndən razı qalsınlar" düşüncəsi olan insanlar daha tez aldanır. Çünki qarşıdakının istəklərini yerinə yetirməyə çalışarkən manipulyasiyaya açıq olurlar.

"Yox" demək bacarığı zəif olanda insan istəməsə də razılaşır, buna görə də daha asan aldanır və istismar olunur", - deyə mütəxəssis bildirib.

Ekspert deyir ki, keçmişdə aldadılmış, xəyanət görmüş və bununla bağlı özünə inamı zədələnmiş insanlar yenidən eyni tələyə düşə bilirlər:

"Travma bəzən doğru insanı deyil, tanış gələn davranışı seçdirir. Tez-tez aldanmamaq üçün "Sərhəd"lər qoymağı öyrənmək vacibdir. Hər dəfə "hə" demək məcburiyyəti yoxdur. İnsan sərhəd qoyduqca daha az manipulasiya olunur.

Ağıllı etibar – tədricən qurulan etibardır. Bir insanın sözləri yox, davranışları zamanla güvən yaradır. Səmimiyyət gözəldir, amma "hər kəs mənim kimidir" fikri çox zaman xəyal qırıqlığı ilə nəticələnir.

Bəzən qarşımızdakı insan bizə yaxşı hisslər yaşadır deyə ona inanırıq, amma davranışlar və reallıq hisslərdən daha dəqiqdir".

Əbdül Səlimli bildirib ki, insan ilk öncə öz dəyərini bilməlidir:

"Heç kimin onu istifadə etməsinə icazə verməməlidir. Çünki sevgi, diqqət və qəbul almaq üçün özünü qurban vermək doğru deyil.

"Gaslighting", yalan vəd, emosional şantaj, Love bombing, həddindən artıq şirin davranışlar və.s bunlar istismarçıların tez-tez istifadə etdiyi metodlardır. Bunları tanıyan insan daha az aldadılır.

Tez-tez aldadılmaq zəiflik deyil, çox zaman empatiya, yaxşı niyyət və sərhədsizlik kimi xüsusiyyətlərin təsiridir. Doğru psixoloji sərhədlər və tədricən etibar insanın özünü daha sağlam şəkildə qorumasını təmin edir".

Ziya SƏCCAD