Beynəlxalq əmtəə bazarlarında gümüşün qiyməti tarixi maksimuma yüksəlib. İlk dəfə olaraq bir troya unsiyası üzrə qiymət 82 dollar səviyyəsini keçərək rekord göstərici qeydə alınıb.

AVESTA.AZ xəbər verir ki, Bakı vaxtı ilə gecə saatlarında gümüşün qiyməti sürətlə artaraq əvvəlcə 81,95 dollara çatıb ki, bu da təxminən 6 faizlik yüksəliş deməkdir.

Qısa müddət sonra artım davam edərək metalın dəyəri bir troya unsiyası üçün 82,44 dollara qədər yüksəlib.

Eyni zamanda, qiymətli metallar bazarında qızıl da müsbət dinamika nümayiş etdirib. "Comex" birjasında 2026-cı ilin fevral ayı üzrə qızıl fyuçerslərinin qiyməti bir troya unsiyası üçün 4568 dollar səviyyəsində qərarlaşıb və cüzi artım qeydə alınıb.

Analitiklər gümüşün bahalaşmasını qlobal maliyyə bazarlarında artan risklər, inflyasiya gözləntiləri və təhlükəsiz aktivlərə tələbin güclənməsi ilə əlaqələndirirlər.